2013 оны гуравдугаар сарын 06-ны Нийслэлийн Засаг даргын А/163 тоот захирамжаар нийслэлийн нийтийн зориулалттай өмчийн тооллогын бэлтгэл ажлыг хангах ажлын хэсгийг томилогдсон байна. Энэхүү өмчийн тооллогыг дөрвөн жилд нэг удаа тоолдог. Гэхдээ өнгөрсөн жил Засгийн газрын албан даалгавар болон Төрийн өмчийн хорооны тогтоолын дагуу нийслэлийн өмчийн эд хөрөнгийн үзлэг тооллогыг Нийслэлийн өмчийн харилцааны газраас зохион байгуулсан байна. Тооллогоор нийт 638 байгууллагын бүртгэлийн үнээр 1250,3 тэрбум төгрөгийн эргэлтийн бус хөрөнгө тоологдсон аж. Дүүргүүдийн хувьд есөн дүүргийн нутаг дэвсгэрт эзэмшигч байгууллагын бүртгэлтэй болон бүртгэлгүй нийт 284,2 тэрбум төгрөгийн нийтийн эзэмшлийн эд хөрөнгө хамрагдсанаас 81,1 хувь нь бүртгэлтэй, үлдсэн хөрөнгө нь бүртгэлгүй байсан гэнэ. Энэхүү өмчийн хөрөнгийн тооллогын дүнгээр данс бүртгэлд тусгагдаагүй нийт 122,6 тэрбум төгрөгийн хөрөнгө тоологдсоноос 43 орчим хувь нь нийтийн эзэмшлийн эд хөрөнгө байжээ.

Мөн аж ахуйн нэгж байгууллагуудын үндсэн хөрөнгийн дансанд бүртгэлтэй 3,8 тэрбум төгрөгийн балансын анхны үнэ бүхий 332 гүний өрөмдмөл худаг, цэвэр усны цооног, угсралтын систем, бүртгэлд тусгагдаагүй 0,6 тэрбум төгрөгийн 56 өрөмдмөл худаг тоологдож байсан байна. Тиймээс нийтийн эзэмшлийн эд хөрөнгийг нарийвчлан тоолох шаардлага дахин гарч иржээ. Нийслэлийн өмчийн эд хөрөнгийн тооллогоор нийслэлийн өмчид байгаа байшин барилга, зам талбайгаас эхлүүлээд бүх хөрөнгийг тоолдог. Харин Нийтийн эзэмшлийн эд хөрөнгөд худаг, услалтын систем, авто зам, гүүр, гэрэлтүүлэг, ногоон байгууламж, явган зам зэрэг нийслэлийн төсөвт өртгөөр байгуулсан байгууламжууд орох юм. Одоогоор тооллогын бэлтгэл ажлыг хангаж байгаа аж. Бэлтгэл ажлын хүрээнд журмын төслөө боловсруулаад Нийслэлийн иргэдийн төлөөлөгчдийн хурлаар хэлэлцүүлэх юм байна. Журам батлагдсаны дараа журмынхаа дагуу тооллогын ажлаа эхлүүлэх гэнэ.