Монгол Улсын хэмжээнд үйл ажиллагаа явуулж байгаа 25 хорих анги байдаг. Өнгөрсөн сард зарим нэг хорих ангиудад шалгалт хийжээ. Тэгвэл “Авдрант”-ын хорих ангид хийсэн  шалгалтаар тэд хөдөлмөр эрхэлж байгаа ялтнуудад цалин бодож өгдөггүй байжээ. Энэ анги уул уурхайн бүстэй бөгөөд ялтнууд чулуу олборлох хүнд хөдөлмөр эрхэлдэг. Гэтэл тэдэнд нэг ч төгрөгийн хөлс тооцож өгөөгүй байсан байна. Уг нь Засгийн газрын сүүлд гаргасан хөдөлмөрийн цагийн хөлс 800 гаруй төгрөг. Энэ тарифаар бодож өгөх ёстой юм. Уг нь ялтан сард авах цалингийн тодорхой хувийг нь хохирлыг нөхөн барагдуулахад өгөх ёстой. Хөдөлмөрийн хөлсний 10 хувийг ялтан өөрөө зарцуулах эрхтэйгээр журамласан байдаг. Үүнийг илүү өргөн хүрээтэйгээр нэг ч ялтныг үлдээлгүйгээр бодож өгөх ёстой юм. Өөрөөр хэлбэл, боолын хөдөлмөр эрхлүүлэх ёсгүй, хөдөлмөр үнэлгээтэй байх ёстой билээ.