Лениний музейтэй холбоотой асуудлаар өнөөдөр Соёл, спорт, аялал жуулчлалын яам, Төрийн өмчийн хорооноос мэдээлэл хийж, цуглуулсан баримтуудаа дэлгэлээ.
        Лениний музейг үлэг гүрвэлийн музей болгохоор ашиглахаар болсон. Харин тус барилгыг МАН-ын удирдлагууд хүлээлгэн өгөхгүй байгаа билээ. Тэгвэл Төрийн өмчийн хорооноос 1997 онд Лениний музейг МАН ашиглах эрх олгосон Нийслэлийн давж заалдах шатны шүүх, Дээд шүүхийн шийдвэрийг хянуулах тухай хүсэлтийг гуравдугаар сарын 13-нд Нийслэлийн шүүхэд гаргасан тухай өнөөдөр мэдээллэв.

Тодруулбал, Засгийн газраас тус музейг үлэг гүрвэлийн байр болгохоор тогтоол гаргасаны дагуу Соёл, спорт, аялал жуулчлалын яам болон Төрийн өмчийн хорооноос МАН-д музейн барилга, үзмэрийг хүлээлгэж өгөхийг хүссэн албан бичиг гурван ч удаа явуулсан байна. Одоог хүртэл албан бичигт хариулж, музейг хүлээлгэж өгөөгүй учраас албаныхан тухайн үед гарч байсан шүүхийн шийдвэрийг нягтлуулж, музейг хүлээж авахыг яаравчлуулж байгаа ажээ.

Лениний музейг анх Сайд нарын зөвлөлийн тогтоолоор Соёлын яамны захиалгаар 1967 онд Шинжлэх ухааны академи байгуулж байсан баримт бий гэнэ. Ингээд музейг барих, үйл ажиллагааг нь үргэлжлүүлэх, үзмэрүүдийг худалдаж авахад 1974-1980 онд улсын төсвөөс санхүүжүүлж байжээ. Үүнээс хойш Намын түүхийн институт хүлээн авч, ашиглагчийн статустай болсон бөгөөд МАН одоог хүртэл ашиглаж байгаа аж. Тиймээс уг музейг төрийн хөрөнгөөр боссон гэж үзэж байгаа юм. Тиймээс уг музейн барилгыг тавдугаар сарын 18-нд болдог Дэлхийн музейн өдрөөс өмнө хүлээж авч, ашиглалтад оруулах зорилготой байгаа  аж.