Монгол цэргийн алба хаагчид  бусад орны цэргүүдээс зохион байгуулалтаараа ялгарах ёстой. Яагаад гэвэл Аравт болж нэгдсэн, 10 хүн дэлхийг өөрчилсөн түүхтэй хэмээн Монгол цэргийн өдрийг тохиолдуулан СТӨ-нд болсон Өмнөд Судан улсад НҮБ-ын мандаттай энхийг сахиулах ажиллагааны эхний ээлжинд амжилттай үүрэг гүйцэтгээд ирсэн алба хаагчидтай уулзах үеэр Монгол Улсын Ерөнхийлөгч Ц.Элбэгдорж хэлэв.

    Тэрбээр цааш нь "Зэвсэгт хүчний алба хаагчдын сахилга бат, зохион байгуулалтын асуудал"-ыг чухалчиллаа. Удирдах, удирдуулах ёс, үүрэг биелүүлэх чадвараараа бусдаас ялгарах учиртай. Өөрөөр бид хүнтэй л адилхан хүн. Нэгэнт  та тангараг өргөсөн, үүрэг гүйцэтгэж буй бол ямар ч хүнд нөхцөл байдлаас шантрах эрхгүй.  Шантрах ч ёсгүй. Цэргийн хүмүүжилтэй хүн итгэл даадаг,  хэлсэндээ хүрэхийн төлөө явдаг хүн байдаг. Цэргийнхэнд манай ард иргэд хамгийн ихээр итгэдэг. Цэргээрээ дамжиж монгол эх орон, монголын ард түмэн чангарч, хүний хувьд хөгжиж байдаг. Сар шинийн  өмнөхөн Өмнөд Судан улсад хийсэн албан ёсны айлчлалын үеэр энхийг сахиулах үүрэг гүйцэтгэж байгаа алба хаагч, дайчидтайгаа уулзаж та бүхнээрээ бахархаж явлаа. Цаашид тус улсад 10 гаруй жил үргэлжлэх энхийг сахиулах ажиллагаанд Монгол Улс алба хаагчдаа илгээн, оролцох боломжтой"-г ч цохон тэмдэглэв.

 Энэ үеэр  эх орныхоо дөрвөн зүг найман зовхист ажиллаж амьдарч буй цэргийн алба хаагч, тэдний гэр бүлийнхэнд мэндчилгээ дэвшүүлэв.    

     Монгол Улсын Батлан хамгаалахын сайд Д.Бат-Эрдэнэ цэрэг, дайчдад хандан хэлсэн үгэндээ  "Монголын төр монгол цэрэгтэйгээ цаг ямагт амь нэгтэй байж ирсэн. Монголын цэрэг ч эрхэт төрдөө тулгуур багана нь, ард түмэндээ өмөг түшиг нь байсаар ирсэн билээ. Монголын төр, цэрэг, ард түмнийг бэхэлж холбосон эвийн гагнаас нь эвдэршгүй бат байдаг тул Монгол Улс мандан бадарсаар, монголын ард түмэн аюулгүй, амгалан аж төрсөөр байгаа юм. Төр, ард түмэн, цэргийн ариун холбоо нь ийм сарнишгүй байдаг тул монгол хүний бүхий  л эрхэм дээд нандин чанар, монголын ард түмний хүнлэг ариун ёс суртахуун төрийнхөө бодлогод шингэж, төр нь цэрэг дайчдынхаа өргөсөн тангараг, өнгө жавхаа, үл тасрах үйлсээс нь тодрон харагддаг юм" гэлээ. 
 
    Уулзалтын төгсгөлд Өмнөд Судан улсад үүрэг гүйцэтгэсэн батальоны дайчдыг төлөөлж, салаан дарга н.Баттүшиг хэлэхдээ "Та бүхэнд төрөлх эх орондоо эсэн мэнд, амар амгалан хүрэлцэн ирж, хайртай бүхэнтэйгээ элгээ дэвтээн золгосон энэ баярт сайхан өдрийн мэндийг өргөн дэвшүүлье. Төр түмнийхээ итгэлийг өргөж, тив алгасан энхийг сахиулах үйлсэд хүчин зүтгэсэн дайчид бид нэгэн аавын хүүхдүүд мэт сэтгэл зүрх нэг байж, Монгол улсынхаа алтан соёмбот далбааг аглаг Африкийн тэнгэрт өргөн мандуулж, үүргээ нэр төртэйгээр биелүүлээд ирсэндээ баяртай байна" гэлээ.
Монгол цэргийн өдрийг тохиолдуулан тус уулзалтад "Цэнхэр дуулгатнууд"-аас гадна Улаанбаатар цэргийн хүрээний алба хаагчид, Хууль сахиулах үүрэг бүхий тангараг өргөсөн алба хаагчид, Хууль сахиулахын их сургуулийн сонсогчид, "Тэмүжин-Өрлөг" цэргийн дунд сургуулийн сурагчдын төлөөлөл оролцов.     
Уулзалт урлагийн тоглолтоор үргэлжилж, нийслэлийн төв талбайд Эзэн Чингис хааны хөшөөнд цэцэг өргөх ёслолын үйл ажиллагаагаар өндөрлөх ажээ.