“Зөв хүн зөв хөгжил” ТББ-аас Ерөнхийлөгч Ц.Элбэгдоржийг халз мэтгэлцээнд урьж буйгаа өнөөдөр мэдэгдлээ.

Тэд энэ оны нэгдүгээр сарын 9, 17, хоёрдугаар сарын 19-нд Ерөнхийлөгчид хандан өнөөгийн манай улсын хөгжил хийгээд цаашдын хөгжлийн чиг хандлагын талаар ил захидал илгээсэн байна.

Гэвч Ерөнхийлөгчөөс хариу ирээгүй тул ийнхүү дөрөв дэх захидлаа хэвлэлээр хүргэж, мэтгэлцээнд уриад байгаа нь энэ аж.

“Зөв хүн зөв хөгжил” ТББ-ынхан ярихдаа "Монгол үндэстэн XX зуунд юу хийж бүтээсэн бэ? XXI зуунд юу хийж бүтээх гээд байгаа юм бэ? Энэ асуудлаар төрийн тэргүүнээс тайлбар авч, мэтгэлцье гэсэн юм. Бид өнгөрснөө үгүйсгэсэн 23 жилийг ардаа үджээ, харин өнөөдөр тэр үгүйсгэсэн нийгмээсээ илүү гарч, илүүг бүтээж чадсан уу? XX зууны түүхээ эргэн нэг харж, XXI зууны Монголоо хэрхэн бид босгох вэ? Гэсэн асуултад Монгол гэдэг айлын эцэг болсон ерөнхийлөгчөөс хариу авах гэсэн юм гэлээ"
Ямартай ч тэд өөрсдийн энэхүү захидалд хариу авна гэдэгтээ итгэлтэй байгаа бөгөөд хэрэв Ерөнхийлөгч мэтгэлцэхээс татгалзах эсвэл хариу өгөхгүй бол тав дахь ил захидлаа илгээхээ хэлсэн юм.