“Буруу гарын хүмүүстэй буруу гараар тэмцэх болно” хэмээх М.Энхсайханы хэлсэн үг Н.Алтанхуягийг ихэд сандаргасан аж. Уг нь М.Энхсайхан энэ үгийг Н.Алтанхуягт биш Х.Баттулга сайдад хандаж хэлсэн. М.Энхсайхан, Х.Баттулга хоёрын тэмцэл Засгийн газрын хувь заяатай холбогдох учир Ерөнхий сайд ихэд сандарчээ. Тэгээд Төрийн өмчийн хорооны даргыг өөрт нь хэлэлгүй М.Энхсайханыг халлаа хэмээн ажлаас нь чөлөөлчихсөн. Түүгээр ч зогсохгүй Засгийн газрынхаа хувь заяаг хадгалж үлдэхийн тулд М.Энхсайханд шинэ албан тушаал амласан байна. Тийм учраас л М.Энхсайхан Засгийн газраар туг тахичихгүй тухтайхан хүлээнгээ “хаа очиж асуудлын учрыг ойлгуулдаг, ажил хийх гэж зүтгэдэг Ерөнхий сайдтай  юм байна билээ шүү” хэмээн Н.Алтанхуягт тал засаж байсны учир тайлагдлаа.

  Тал засалт нь үр дүнгээ өгснийх үү эсвэл Н.Алтанхуяг амлалтдаа хүрсэн үү  М.Энхсайхан шинэ ажилд томилогдохоор боллоо. Түүнийг Тавантолгойд барих цахилгаан станцын төслийг удирдан ажиллуулах шийдвэр гарчээ. Гэхдээ энэ шийдвэр нь албажаагүй болохоос биш М.Энхсайхан ажилдаа орсон хэмээн эх сурвалж мэдээллээ. Тэрээр аман тохирооноос Н.Алтанхуяг ухрахгүй гэж бодож байгаа учир Тавантолгойн ажилтай танилцаад амжсан байна. Бас Ухаа худагаар ч ороод гарч. Түүнийг "Эм-Си-Эсийн"-хэн тал засан угтсан хэмээн эх суралж мэдээллээ. Тэрээр Тавантолгой ард түмний мэдэлд байгаа, үндэсний компаниуд оролцож байгаа учир Оюутолгойгоос хамаагүй илүү үйл ажиллагаа явуулж байгаагаас гадна эх оронч байна хэмээн дүгнээд буцжээ. Мөн монголчууд өөрсдийгөө гололгүй юуг ч бүтээж чадна гэдгийг Тавантолгойн бүтээн байгуулалт харуулж байна, удахгүй нэг бүтээн байгуулалтыг нь би удирдан ажиллахаар болж байгаа хэмээн ам алдсан сурагтай. Түүний энэ үйлдлийг харсан зарим хүмүүс шийдвэр гараагүй байхад хэтэрхий эрт баярлаад ажлаа хүртэл шалгаад эхэллээ хэмээн хөндлөнгөөс дүгнэлт өгөөд буй аж. Ямар ч байсан Засгийн газрыг тогтвортой байлгахын тулд чухал ажлаа М.Энхсайханд хариуцуулахаар  шийдсэн бололтой.
   Учир нь Засгийн газраас Тавантолгойн цахилгаан станц болоод бусад хөрөнгө оруулалтад нь 50 сая ам.долларын хөрөнгө оруулалт хийхээр шийдвэр гаргасан. Үүнийг мэдэх эрх мэдлийг М.Энхсайханд өгч байж засгаа бүтэн авч үлдээхэр шийджээ. М.Энхсайханыг ашиглаж Засгийн газрыг хөдөлгөх гэсэн МАН-ынханы санаархал ийн талаар болж байна.
   Уг нь энэ ордыг хэрхэн ашиглахаас Монголын ирээдүй шалтгаална гэсэн дүгнэлтийг үе, үеийн улс төрчид хэлдэг. Учир нь энэ орд газарт коксийн, гангийн, химийн үйлдвэр барихын тулд эхлээд цахилгаан станц төмөр зам тавихаар шийдсэн юм. Ийнхүү энэ бүхэн М.Энхсайханы бодлогоор шийдэгдэх нь.

 Харамсалтай нь хувь заяаны шийдлээр М.Энхсайхан дахиад л нөгөө “буруу гар” хэмээн цоллосон Х.Баттулга, А.Гансүх хоёртойгоо хамтран ажиллахаас өөр гарцгүй салбарт томилогдох нь. Учир нь тэнд төмөр зам тавихын тулд энэ хоёр сайдтай дахин тулахаас өөр аргагүй. Уг нь тэд Тавантолгой руу ямар төмөр зам тавих вэ гэдэг талаар маргалдсан бол одоо ямар цахилгаан станц барих вэ, хэний компанийг оруулах вэ гэдгээс болоод дахиад л тулалдах байх. Мэдээж тэднийг эрх ашиг сонирхол нь нэгтгэж эсрэгээрээ найз нөхөд болгох өөр ч зам бий.