Ерөнхийлөгчийн сонгуульд МАХН-аас нэр дэвших хүмүүсийн нэрс өчигдөр албан ёсоор баталгаажлаа. МАХН-ынхан өөр намтай хамтарсан ч, дангаараа оролцсон ч  энэ намд нэр дэвшигчдийн сонирхолтой өрсөлдөөн өрнөх шинжтэй. Саяхан болсон тус намын Бага хурлын үеэр хамгийн хүчтэй яригдсан асуудал нь "Ерөнхийлөгчийн сонгуульд хэнийг нэр дэвшүүлэх вэ" байв. Намын даргагүй нам хэнийгээ дэвшүүлэх вэ дээ гэж ёжилж байсан хүмүүсийг  гайхшруултал нь мадлав. Учир нь энэ үеэр олон хүн нэр дэвшихээр гарын үсэг зурсан юм. Бага хурлын үеэр Шадар сайд Д.Тэрбишдагва, Сангийн сайд Ч.Улаан, Эрүүл мэндийн сайд Н.Удвал, УИХ-ын дэд дарга Л.Цог, УИХ-ын гишүүн Ц.Цолмон, хуульч С.Нарангэрэл нарын нэр яригдаж байсан ч Ц.Цолмон, С.Нарангэрэл нар хурлын танхимд байгаагүйгээс бусдыг нь ерөнхийлөгчийн сонгуульд нэр дэвшүүлэх нь зүйтэй гэж Бага хурлын гишүүд үзсэн. Ц.Цолмон гишүүн өөрийн чармайлтаар энэ жагсаалтад нэмэгджээ. МАХН-ынхан сонгуульд нэр дэвших хүмүүсээ албан ёсоор тодруулсан нь энэ нам сонгуульд дангаараа оролцоно гэсэн үг биш юм. МАН-тай хамтарч оролцлоо гэхэд эхлээд МАН ба МАХН-ын нэр дэвшигчид хоорондоо өрсөлдөж байж бусад намынхантай өрсөлдөнө гэсэн үг.

    Монгол Улсын Ерөнхийлөгч  болно гэж МАХН-аас нэр дэвшиж буй эрхмүүдийн хэн нь хэн бэ?

Д.Тэрбишдагва: Шадар сайд Д.Тэрбишдагва бол МАХН-ын энэ жагсаалтын хамгийн эхэнд эрэмбэлэгдэх хүн. Тэрбээр намын дарга Н.Энхбаярт хамгийн их санаа тавьдаг нэгэн. Анх Н.Энхбаярыг баривчлагдахад газар дээр нь очиж үгээ хэлж байсан, дараа нь “урвагч” гэж цоллуулан байж МАХН-д орсон. Хэрэв Н.Энхбаярыг баривчилсны дараа МАХН-д Ч.Улаан, Д.Тэрбишдагва нар ороогүй байсан бол энэ нам өдий зэрэгтэй явна гэдэг хэцүү. Тиймээс Д.Тэрбишдагвыг хэцүү цагт шалгарсан сайн “нөхөр” гэж үздэг хүн МАХН-ын гишүүд, дэмжигчид дунд бий. Тэр бол нам дотроо хамгийн нэр хүндтэй  бөгөөд буйр суурьтай учир МАХН дотроо хамгийн олон санал авах магадлалтай.

Ч.Улаан: Сангийн сайдын ажлыг олон жил хийж буй Ч.Улааныг гар өргөн дэмжигчид байхад бас улс төрд хэт их хутгалдсан гэж буруушаах нь бий. Ч.Улаан УИХ-ын танхимд ч, түүнээс гадна ч аливаа асуудалд байр сууриа төдийлөн илэрхийлээд байдаггүй. Хааяа дорвитой үг хэлчихээд холоос ажиглаж суудаг нэгэн. Гэхдээ Ч.Улаан МАН-ын Д.Хаянхярваагаас хүлээж авсан улайссан төрийн дансыг цэгцэлж байна. Мэдлэг, чадвар, туршлага түүнд байгаа ч бусдаас хамаарахгүй зоригтой алхам хийж чадах хүн  мөн үү гэсэн асуулт МАХН-ын гишүүдийн толгойд эргэлдэж байгаа аж.

Н.Удвал: Эрүүл мэндийн сайд Н.Энхбаярын биеийн байдалд олигтой анхаараагүй, үүнд санаа тавиагүй гэж Н.Энхбаярын гэргийд зэмлүүлснээс хойш Д.Удвалын нам дотроо нэр хүнд нь бага зэрэг унасан гэж эх сурвалж мэдээллээ. Тэрбээр МАХН-ын генсек байхдаа хүчтэй эмэгтэй гэдгээ харуулж чадсан ч Шинэчлэлийн Засгийн газрын сайд болсноор албан тушаалаасаа болоод намын даргаа хаацайлах үг унагах нь ховор болсон. Тиймд Н.Удвалыг намаа төлөөлж өрсөлдүүлэх дээр тулвал ширүүн маргаан өрнөж магадгүй. Намын гишүүдийн “Та Н.Энхбаярын төлөө юу хийв, цаашид юу хийж чадах вэ? гэсэн асуултад тэр хариулах хэрэгтэй болно. Учир нь энэ хатагтайг Н.Энхбаярын хүн гэж үздэг.

Л.Цог: УИХ-ын дэд даргаар ажиллаж байгаа ч багахан үүрэг рольтой хүн гэж түүнийг тодорхойлжээ. Тэрбээр туршлагатай, буйр суурьтай гэсэн имижтэй. Тэр болгон гол дүрд тоглоод байдаггүй ч итгэл даах хүн гэдэг утгаараа олон санал авах магадлалтай.

Ц.Цолмон: Нэр дэвшигчдийн дундаас орж ирсэн Ц.Цолмон гишүүнийг Ерөнхийлөгчийн сонгуульд намыг нь төлөөлж оролцоно гэвэл дургүйцэх хүн олон байгаа. Тэрбээр МҮАН-ын жагсаалтаар УИХ-д орсон ч МАХН-д элсэж шуугиан тарисан. Түүнийг улс төрийн үзэл баримтлалын хувьд ямар хүн бэ, өөрийн гэсэн үнэт зүйл нь юу вэ гэдгийг мэддэг хүн МАХН-д байдаггүй гэж ярьдаг. Учир нь тэр МАХН-ынхны хувьд шинэ хүн бөгөөд намын даргаа аврах, намаа сэргээх зэрэгт ямар нэг гавьяатай ажил хийгээгүй гэдэг.
    
    Ирэх сард болох МАХН Бага хурлаараа өөр намтай эвсэх үү, үгүй юу, эвсвэл ямар намтай гар барих вэ гэдгээ шийдэхээр зэхэж буй. Тэд хэнтэй ч эвссэн "МАХН" гэдэг айлд том амбиц, ширүүн өрсөлдөөн өрнөж магадгүй байна. МАХН-ын Ерөнхийлөгчийн сонгуульд дэлгэсэн эхний хөзөр ийм байна.