Сүүлийн үед хүч төрөн гарч ирж байгаа охидын хамтлаг болох  “Honey moon” хамтлагийнхантай цөөн хором  ярилцлаа.

-Сүүлийн үед танай хамтлаг  ямар уран бүтээл дээр ажиллаж байна вэ?

- Сидиний ажил хийгдээд явж байна. Удахгүй шинэ уран бүтээлүүд гарна.

- Манай уншигчидтай анх удаа уулзаж байна. Хамтлагаа танилцуулахгүй юу?

    - Солонго:  “Honey moon” хамтлаг дөрвөн гишүүнээс бүрддэг. Бид 10 жилийн сайн найзууд. Оюутан болоод хамтлагаа байгуулсан.  Чемка, Урангоо бид гурав “Оюуны ундраа” сургуулийг төгссөн. Харин Золоо Солонгост сургуулиа төгсөөд ирсэн.  Мөн Чемка сэтгүүлч мэргэжлээр сурч байгаа.

-Багадаа ямар хүүхдүүд байв?

Солонго: Би багадаа хөдөлгөөнтэй сахилгагүй талдаа хүүхэд байсан.

Золоо: Багаасаа Солонгост амьдарч өссөн. Гэртээ л ихэнх цагийг өнгөрөөдөг, ичимхий даруухан хүүхэд байлаа.

Урангоо: Мөн л багаадаа гэртээ ихэнхдээ байдаг, найзууд орцонд ирж уулздаг байлаа. Зураг зурах, хөгжим сонсох дуртай.

-Урлагт анх хэрхэн хөл тавьж байв?

Солонгоо: Багаасаа л дуулах дуртай хүүхдүүд байлаа. Арван жилд байхдаа найрал дуунд Чемка, Урангоо бид гурав явдаг байсан. Энэ үеэс л дуулах ёстойгоо мэдэж байлаа. Тэр үед сургуульдаа Angel,  Lаky гэх мэт өөр нэртэй байсан.

    Урангоо: Найзуудтайгаа хамтлагаа байгуулахаасаа өмнө амьд хөгжим тоглодог байсан.

- Тэгвэл яагаад “Honey moon” гэж нэрлэсэн юм бэ?

Урангоо:  Бид олон нэрнээс энэ нэрийг сонгосон.  Гэхдээ хамгийн анх би хамтлагийнхандаа санал болгож манайхан зөвшөөрсөн. Яг орчуулбал  “Бал сар” гэсэн утгатай үг. Гэхдээ арай өргөн утгаар нь тайлбарлавал амьдралын хамгийн дурсамжтай мөчүүдийг  бэлгэдэж  байгаа юм.

-Хамгийн анхны уран бүтээл чинь юу вэ?

-“Хайр сэтгэл” гээд дуу байгаа. Хамтлаг маань одоо байгуулагдаад гурван жил болж байна. Эхний жил энэ дууг дуулж найзуудаараа дүрсжүүлж байсан.

-Аль төрөл, жанраар уран бүтээлээ туурвихыг эрмэлздэг бэ?

-Бид ийм урсгалаар дуулна гэж тогтоогоогүй. Хүмүүсийн сонсохыг хүссэн, шинэлэг дууг л хийе гэж бодож байгаа.

- Охидын олон хамтлагаас “Honey Moon” юугаараа онцгойрох бол?

- Бидний хувьд анх өөрсдийн боломж бололцоонд тулгуурлаж, цэвэр хөдөлмөрөөрөө гарч ирсэн хамтлаг. Бусад залуу хамтлагууд хэдий хөдөлмөрлөж байгаа ч анхнаасаа бэлэнчлэх сэтгэлгээтэй болчихвол цаашид явахад хүндрэлтэй болов уу гэж боддог.  Манай хамтлагт  продюсер, спонсор одоохондоо байхгүй.  Намуун студитай хамтарч ажиллаж байгаа. Бүх зүйлийг эхнээс нь эхэлж, өөрсдөө хийдэг.  Зөвхөн уран бүтээлээс гадна стиль имиж, хувцаслалт гээд бүх тал дээр бид өөрсдөө анхаардаг.

    -Чөлөөт цагаа хэрхэн өнгөрөөдөг вэ?

-Золоо: Найзуудтайгаа гадуур зугаалж, кино үздэг. Аль болох хөгжилтэй өнгөрөөхийг боддог.

Урангоо: Миний хувьд цэвэр агаарт гарч зугаалах дуртай. Мөн ном уншиж, загварын суваг үздэг.