Энэ сарын 23-ны орой “Дижитал” хамтлагийн ахлагч Баавар ШШГЕГ-ын харьяа цагдан хорих 461 дүгээр ангид шатсан хэрэг гарсан. Тэрээр өдгөө 3-4 дүгээр зэрэглэлийн түлэгдэлттэй биеийн байдал нь хүнд байгаа билээ.

Өнгөрсөн пүрэв гаригт Бааварт сэтгэл санааны дэм өгөхөөр урлагийнхныг төлөөлж МУГЖ Т.Ариунаа, "Сүнс" хамтлагийн ахлагч Б.Лхавгасүрэн, "Voice" хамтлагийн ахлагч Б.Баттулга, гитарчин продюсер Д.Өөжгий тэргүүтэй “Монголын дуу бичлэг бүтээгчдийн үндэсний төв”-ийн удирдах зөвлөлийн гишүүд эргэсэн бол баасан гаригт УИХ-ын гишүүн О.Баасанхүү эмнэлэгт очиж ар гэрийнхэнтэй нь уулзаж, ярилцжээ.

Тэрбээр “Бааварыг эмчлүүлж хурдан эдгэхийг хүсч байгаагаа илэрхийлээд хэргийн үнэн зөвийг олоход өөрийн  бүхий л бололцоогоор туслах болно. Ер нь шүүхээр хэрэг нь шийдвэрлэгдээгүй сэжигтэн сэтгэл санаа, эрүүл мэндээрээ хохирч байгаа тохиолдлууд бол Хуульзүйн яамны бодлого буруу явж ирсний үр дүн. Тийм атал “гал унтраах” зорилгоор хэдэн хүнийг ажлаас нь халаад өнгөрч байна. Ийм байж болохгүй. Энэ хэрэгт  ШШГЕГ-ын дарга Ядамдорж, дэд дарга П.Хосбаяр нар албан тушаалаа өгөх хүртэл хариуцлага хүлээх ёстой. Хуульзүйн сайд Х.Тэмүүжинд ч энэ хамаатай. Ардчилал хөгжсан бусад  оронд бол огцрох тухай асуудал яригддаг. Хэрэв энэ хэргийг үнэн зөвөөр шийдүүлэхийг хүсч байгаа бол олон нийтийн анхаарлын төвд хэвээр байлгах хэрэгтэй” гэв.

УИХ-ын гишүүн О.Баасанхүүтэй  Бааварын ар гэрийнхэн санал нэгтэй байгаагаа илэрхийлээд “Өдгөө хэний буруугаас, юунаас үүдэж гал гарсныг тогтоохоор харьяаллын дагуу Баянгол дүүргийн цагдаагийн хэлтэст ахмад н.Наранбаатар гэдэг байцаагч шалгаж байгаа. Мөн Нийслэлийн прокурор, Чингэлтэй дүүргийн цагдаагийн хэлтэс, Хүний эрхийн үндэсний комисс зэрэг газарт хандсан. Хэрэв үнэн зөвөөр шийдвэрлэгдэхгүй бол дараагийн шатны байгууллагуудад хандана” гэлээ.