БНСУ-ын “Инчон” нисэх онгоцны буудал дээр Монгол Улсын иргэн, 6 настай Соронзонболдын Амарбаясгалан хүү харгалзах хүнгүйгээр ганцаараа байгаа талаар мэдээлэл гараад байгаа билээ. Хүү чухам ямар учраас ганцаараа тус онгоцны буудалд байгаа болон хэрхэн хил давсан талаар Хууль зүйн сайд Х.Тэмүүжингээс тодруулахад тэрээр "Бид Хил хамгаалах ерөнхий газар болон холбогдох байгууллагынхантай холбогдож асуудлыг тодруулж тогтоосон.
Хүү өнөөдөр “Korea air” компанийн “Гараас гарт” үйлчилгээгээр Монгол Улсаас БНСУ-ыг зорьсон байна. “Korea air” компани хүүг хариуцаж очих ёстой газар нь хүргэх үүрэгтэй юм байна. Хүүгийн ээж бичиг баримтыг нь бүрдүүлээд, Фижид байдаг нагац эгч рүү нь хүүгээ явуулсан. Одоо хүү “Инчон” нисэх онгоцны буудал дээр дараагийнхаа нислэгийг хүлээж байгаа. Фижид буухад нь ээжийнх нь эгч тосч авах юм" гэж хэлсэн юм.

Тэгвэл ГХЯ-ны сайд Л.Болд хүүгийн талаар арай өөр тайлбарыг хийлээ. Тэрээр "Консулын газрынханд Амарбаясгалан хүүг Монгол руу эхний нислэгээр даруй буцаан ирүүлэх үүрэг өглөө. Ирж байгаа мэдээллүүд эргэлзээ төрүүлж байна" гэсэн юм.

Ийнхүү Солонгост байгаа хүүгийн асуудлаар хоёр сайд өөр өөр байр суурь илэрхийллээ .