Хуулийн байгууллагын чадваргүй байдал “Дижитал” хамтлагийн ахлагч асан Бааварыг “од” болголоо. Яг л МАХН-ын дарга Н.Энхбаяр шиг.
    Хуулийн байгууллагын чадваргүй байдал “Дижитал” хамтлагийн ахлагч асан Бааварыг “баатар” болголоо. Яг л МАХН-ын дарга Н.Энхбаяр шиг. МАХН-ын дарга Н.Энхбаярыг өнгөрсөн оны дөрөвдүгээр сарын 13-нд баривчлахаас өмнө иргэдийн ихэнх нь түүнийг “авилгын загалмайлсан эцэг” хэмээн дургүй байв. Гэвч АТГ-ынхны алдаатай баривчилгаа Н.Энхбаярт эерэгээр нөлөөлж “баатар” болгосон юм.

    Тухайлбал, Өнгөрсөн оны дөрөвдүгээр сарын 13-ны үүрийн 6.00 цагт Н.Энхбаярын гэрийн хаалга гэнэт нугасаараа тасарч унав. Юу болсныг ухаарах сөхөөгүй байтал нэг нөхөр юу юугүй шүүхийн тогтоол уншмагц, юүдэнтэй цамцтай залуус гэрийн эзний хөлийг нь гозолзуулаад өргөж гарахыг завдсан. Нойрмог эхнэр нь “Та минь ээ, наад хүн чинь биш гэм” гэхэд тусгай ажилтнууд сая нэг андуурснаа мэдсэн юм. Энэ бол Удирдлагын академийн хажууд байдаг Н.Энхбаярын байрны дээд давхрын айл. Яруу алдарт чекистүүд давхар андуурч, хүн эндүүрсэн нь тэр. Тэр чигтээ гарсан бол сүүлд нь хүнээ яаж солих байсан бол?

    Мөн АТГ-ын ажилтнууд америк кинон дээр гардаг шиг Н.Энхбаярын машиныг хааж зогсоод баривчлахыг завджээ. Энэ комеди тавилттай боевик кинонд оролцогчдын тоо АТГ-ын талд ашигтай буюу илүү байв. Бужигнааны үеэр экс тэргүүн хатагтай эр нөхрөө өмөөрөн гарч ирээд АТГ-ын комиссарыг дарж унагахыг харсан гэрчүүд байна. Тавь гарсан эмэгтэйд хүч хүрэлгүй даруулж унасан хорин хэдтэй мөрдөгч залуу хижээл насны гэр бүлийн хоёрыг жолооч хамгаалагч хоёртой нь дийлж чадаагүй мөрдөгчид тооны хувьд  хоёр дахин илүү. “Манай хүн биеийн тамираар хичээллэдэг болохоор” гэсэн тайлбар Н.Энхбаярын ойрын хүрээллээс цөөнгүй гарсан юм. Энэ үгийг түүний эхнэрт ч хамаатуулж болохоор байгааг О.Цолмонгийн  бие бялдрын бэлтгэл нотлон харуулав.  Харин авилгын “тул” барихаар бэлтгэгдсэн АТГ-ын тусгай ажилтнууд жараахайн дайны чадалтай байлаа.

    Түүнчлэн ганцхан хүнийг баривчлахын тулд 300 гаруй цагдаа Н.Энхбаярын гэрийг бүчин, түүний гутлыг нь ч өмсүүлэлгүй оймстой нь гозолзуулан явсан нь хүмүүсийн эгдүүцлийг төрүүлж тэднийг Н.Энхбаяр руу чиглүүлсэн юм. Бүгд л Н.Энхбаярыг өрөвдөн, түүнийг суллуулахаар тэмцэж эхэлсэн. 

    Гэтэл хуулийнхны энэ чадваргүй байдал дахин нэг хүнийг “баатар" болголоо. ”“Дижитал” хамтлагийн ахлагч асан Бааварыг гав дөнгөтэй байхад шатаасан нь ихээхэн дуулиан тариад байгаа. Гэвч ШШГЕГ-аас “Баавар өөрийгөө шатаахыг завдсан” гэх тайлбарыг өгсөн. Хэдийгээр ийм тайлбар өгсөн ч тэд нотолж чадахгүй бүр таван өөр тайлбар хийж өөрсдийгөө ороов. Бүр сүүлдээ таван өөр тайлбар хийснээ хүн бүр өөрсдийн төсөөллөөр тайлбар хийсэн хэмээн ШШГЕГ-ын дэд дарга нь хээв нэг хариулах нь тэр.

    Анхнаасаа үгээ нийлэлгүй ярьсан ШШГЕГ-ынхны тайлбар, Бааварыг гадны нөлөөтэй шатаажээ гэх хардлагыг олон нийтэд төрүүлсэн юм.

    Гал гарч, Баавар түлэгдэхийн өмнө иргэд мөн л Бааварт дургүй байв. Бүр түүнийг хар тамхичин хэмээн үзэн ядаж байлаа. Гэвч гав дөнгөтэй байхад нь шатаасан галаас болж, иргэдийн үзэн ядалт өрөвдөлт болж хувирсан юм. Одоо олон нийт бүгд Бааварын талд байна. Бүр Ерөнхийлөгч зөвлөхөөрөө, Ерөнхий сайд өөрөө байр сууриа илэрхийлж, УИХ-ын гишүүн О.Баасанхүү хүртэл эргэв. Мөн мэргэжил нэгт рок попынхон хэвлэлийн бага хурал хийж, Бааварыг өмөөрлөө.  Хүний эрхийн байгууллагууд ч анхаарлаа хандуулж байна. Хариуцлага алдсан албан тушаалтнууд ч ажлаасаа халагдлаа.

    Хуулийн байгууллагын чадваргүй байдал хоёр хүнийг ийнхүү “баатар” болголоо. Чадвар, чанараа дээшлүүлэхгүй байсаар цаашид дахин хэдэн хүнийг “баатар” болгох бол?