2011 оны 11 дүгээр сард үйл ажиллагаагаа эхэлсэн Баянгол эмнэлгийн Үр шилжүүлэн суулгах төвийн анхны хуруу шилний хүүхэд дөрвөн сар хүрч, эрүүл саруул бойжиж байна.
Л.Бат-Эрдэнэ, Д.Эрдэнэтуяа нар Баянгол эмнэлгийн Үр шилжүүлэн суулгах төвд хандсан анхны таван хосын нэг аж. Тус эмнэлэг 2011 оны тавдугаар сард нөхөн үржихүйн чиглэлээр үр шилжүүлэн суулгах технологи бүхий тоног төхөөрөмжийг Герман улсаас оруулж ирсэн байна. Б. Билэгт хүү өнгөрсөн 12 дугаар сарын 8-нд Сэлэнгэ аймгийн төрөх тасагт төржээ. Тэрээр 50 см-ийн өндөр, 3,8 кг жинтэй гарсан байна.
Д.Эрдэнэтуяа ярихдаа, “Бид гэрлээд есөн жил өнгөрсөн ч хүүхэдтэй болоогүй. Янз бүрийн эмчилгээ хийлгэсэн үр дүнд хүрээгүй. Хүүхэдтэй болгож өгөхийг гуйн үздэг хардаг хүмүүст их хандсан. Тэгээд хэдэн жилийн өмнө сэтгүүлээс Р.Хадбаатар эмчийн ярилцлагыг олж уншаад энэ эмнэлэгт ирсэн. Жилийн өмнөөс үр шилжүүлэн суулгах эмчилгээ хийлгэж, ийм хөөрхөн хүүтэй боллоо” гэлээ.
Үр шилжүүлэн суулгах төвийн их эмч Р.Хадбаатар, “Герман улсын “Modern Technology Germany” үр шилжүүлэн суулгах лабораторийг дэлхийн өндөр хөгжилтэй 30 гаруй оронд хэрэглэж байна. 2010 оноос хойш манай эмнэлэгт давхардсан тоогоор 700 гэр бүл хандсан. Үр шилжүүлэн суулгаж эхлээд нэг жил 8 сар болж байна. Энэ хугацаанд 47 хүн үр шилжүүлэн суулгахад хамрагдаж жирэмслэлт 28 хувьтай явж байна. Одоогоор 13 хүн жирэмслэснээс найман эх нь тээж байна. Энэ нь өндөр үр дүн юм” гэв.
Ийнхүү манай орны хувьд хосууд харийн орныг зорих хэрэггүй болж эх орондоо асуудлаа шийдэх боломжтой болжээ. Дашрамд сонирхуулахад хуруу шилний анхны хүүхэд 1978 онд Их Британид мэндэлж байв.
Б.Заяа
Сэтгэгдэл (8)