Монгол Улсын иргэн Т.Аятунгаа Филиппин Улсад зорчиж явахдаа түүний хүүхдийн эцэг Сэйнт Киттс ба Невис Улсын иргэн Чарльз Эдвард Эргентэй маргалдаж, улмаар хүүхдийн эцэг нь хүүхдээ авч зугтсан төдийгүй шүүхэд хандаж манай иргэнийг хүүхэдтэй зүй бусаар харьцсан гэх үндэслэлээр шүүхийн шийдвэр гаргуулсан тухай бид өмнө нь мэдээлж байсан билээ.

    Тэгвэл хүүхдийг эх оронд нь буцаах, Ч.Тэргэлсар нь одоо хаана байгаа, бусад улсын иргэншил авсан эсэхийг тодруулж өгөхийг Гадаад харилцааны яамны Консулын газрын захирал Ш.Сүхбаатар Филиппин Улсын Гадаад харилцааны яамны Консулын газрын дарга Жэйм Виктор Б.Лэддатай уулзах үеэрээ хүсчээ.

    Мөн Монгол Улсын иргэн Б.Солонго, Т.Аятунгаа нарыг ямар нотлох баримтыг түшиглэн шүүхээс шийдвэр гаргасныг тодруулах, тэдний  гадаад паспорт,  бичиг баримт, бусад эд зүйлсийг  Монгол Улсад шилжүүлэн авах талаар туслалцаа хүссэн байна.

    Филиппины тал нь Чарльз Эдвард Эргенийг  Филиппин улсын иргэн биш болохыг нотолж уг иргэн нь 2012 оны 12  дугаар сарын 7-ны өдөр Филиппин улсаас гарч явсан, Ч.Тэргэлсар нэртэй иргэн тус улсын хилээр орж гарсан тухай ямар нэг мэдээлэл байхгүй болохыг уулзалтын явцад шалган тодруулж өгөв.

    Б.Солонго, Т.Аятунгаа нар нь өөрсдөө гэм буруугүйгээ  нотлосон бичиг баримт ирүүлээгүй,  шүүхээс дуудсан цагт өөрсдөө ирээгүйгээс тэдний эсрэг шийдвэр гаргахад нөлөөлсөн байх гэсэн хариу өгчээ.

    Манай талаас Монгол улсын иргэн Б.Солонго, Т.Аятунгаа нар нь Интэрполоор эрэн сурвалжлагдаж буйгаар зарлагдсан нь хууль бус бөгөөд Чарльз Эдвард Эрген нь манай иргэдийн эсрэг хуурамч баримт бүрдүүлэн үндэслэлгүй шийдвэр гаргуулсныг мэдэгдсэн байна.  

    Дээрх асуудлуудтай  холбогдуулан иргэдийнхээ эрх ашгийг хамгаалах талаар Филиппины талтай яриа хэлэлцээ өрнүүлж, цаашид  баримт бичиг байгуулах талаар санал солилцлоо гэж ГХЯ-ны Мэдээлэл, гадаад сурталчилгааны хэлтсээс мэдээлэв.