Гадаад харилцааны яамны Консулын газрын захирал Ш.Сүхбаатар Филиппин, Сингапур, Малайз улсад томилолтоор ажиллах явцдаа Малайз, Сингапурын ГХЯ-лын Консулын газрын удирдлагуудтай уулзжээ. Малайзын ГХЯ-ны Консулын газрын Тэргүүн Зулкифли Абдуллатай уулзах үеэрээ тус улсад 2006 онд амь насаа алдсан Монгол Улсын иргэн Ш.Алтантуяагийн хэргийн шийдвэрлэлтийн талаар мэдээлэл хүсч, энэ асуудлаар Монгол Улсын Гадаад харилцааны яам холбогдох байгууллагын төлөөлөл оролцсон хамтарсан ажлын хэсэг байгууллагдсаныг Малайзын талд мэдэгдэв.
Мөн хохирогчын ар гэрээс тавьсан хүсэлтүүдийг айлын талд уламжилжээ.
Малайзын тал шүүхийн ажиллагаанд хөндлөнгөөс нөлөөлөх, оролцох боломжгүйг тайлбарлаад хэргийн давж заалдах шатны шүүх хурал энэ оны 6, эсвэл 8 дугаар сард хийх урьдчилсан товтой байгааг дуулган энэ хэргийн талаар цаашид хамтран ажиллахаар тохиролцов.
Иргэдийн асуудлаар Малайзын ГХЯ ялангуяа Консулын газартай харилцаагаа тогтмолжуулах, монгол иргэдтэй холбогдсон шүүхийн ажиллагааг шуурхайлах, дэмжлэг үзүүлэх талаар Гадаад харилцааны дэд сайд Д.Ганхуягийн захидлыг Малайзын Гадаад харилцааны яамны Төрийн нарийн бичгийн дарга Тан Шри Мохд Раджи Бин Рахманд гардууллаа.
Түүнчлэн Ш.Алтантуяагийн хэргийн өмгөөлөгч Карпал Сингк-тэй уулзаж хэргийг хуулийн хүрээнд шийдвэрлэх, талийгаачийн эцгийн гаргасан иргэний нэхэмжлэлийг хэлэлцэх асуудлыг түргэтгэх, өнчин үлдсэн хоёр хүүхдэд хүмүүнлэгийн үүднээс тусламж хэрэгтэй байгаа болон талийгаачийн шарилын үлдэгдлийг авахад туслалцаа хүсэв.
Өмгөөлөгч Карпал Сингк эрүүгийн хэргийн шүүх хурлын шийдвэрийг тухайн хэрэгт сэжигтнээр холбогдсон цагдаагийн хоёр офицер давж заалдсан тул хэргийг шийдвэрлэх ажиллагааг удааширч байгаа. Үүнтэй холбогдуулан С.Шаарийбуугийн гаргасан иргэний нэхэмжлэлийг шүүхээр хэлэлцэх боломжгүй хүлээгдэж байгаа тухай дурдаад талийгаачийн хоёр хүүхдэд тусламж үзүүлэх асуудлыг Төрийн бус байгууллагаар дамжуулан тавих, шарилын үлдэгдлийг буцаах асуудлыг өмгөөлөгчийн хувьд өөрөө зохицуулж болохыг мэдэгдэв.
Мөн 2013 он гарсаар манай дөрвөн иргэн хар тамхи хадгалсан хэрэгт холбогдон Малайз улсад шалгагдаж байгаа бөгөөд тэдэнд эрх зүйн туслалцаа үзүүлэх, өмгөөлөгчөөр хангах, шүүх хурлын товын талаар мэдээлэл хүссэний гадна манай зарим иргэд уг хэрэгт санамсар болгоомжгүйгээсээ холбогдож хохирч байж болзошгүйг зориуд анхааруулав. Одоогоор тэднээс нэг иргэн нь суллагдаж, гурван иргэнийх нь шүүх хурал хойшлогдоод байна.
Консулын газрын захирал Ш.Сүхбаатар Малайз дахь Монголын оюутан залуучуудын нэгдсэн холбооны удирдагуудтай уулзаж тэдний санал бодлыг сонслоо.
Харин Сингапурын Гадаад харилцааны яамны Консулын газрын Ерөнхий захирал Катерин Вонг Сио Пингтэй уулзах үеэрээ хоёр улсын иргэдийн зорчих хөдөлгөөн өсөж буйтай холбогдуулан иргэдтэй холбоотой гарч буй зарим асуудлын талаар харилцан мэдээлэл солилцов.
Сингапурт Монголын иргэн О.Т 2012 оны долдугаар сард нас барсан бөгөөд уг хэргийг шалгах явцыг түргэтгэж, нэмэлт мэдээлэл гаргаж өгөхийг айлын талаас хүсэв. Цаашид Сингапур Улстай Эрх зүйн туслалцаа харилцан үзүүлэх гэрээний талаар санал солилцож, тодорхой асуудлаар ноот бичиг солилцох журмаар асуудлыг харилцан шийдвэрлэж байхаар тохиролцлоо гэж ГХЯ-ны Мэдээлэл, гадаад сурталчилгааны хэлтсээс мэдээлэв.
Сэтгэгдэл (2)