Долоо хоногийн үг: Энэ долоо хоногийн онцлох үгийг ерөнхийлөгч Ц.Элбэгдорж хэлэв. Тэрээр УИХ-ын чуулганд нилээд анхаарал татах үгүүдийг хэлэв. Уран цэцэн үгтэй түүний хэлсэн үгнээс анхаарал татах хэсгүүдийг 24tsag.mn онцлож байна.

-  Хуулийн засаглал тогтож эхэлж байна. Монгол Улс даргын засаглалтай биш, хуулийн засаглалтай орон болж байна.
- Манай оронд хууль ижил тэгш хэрэгждэг болж эхэлж байна. Алба тушаалтай ч бай, мөнгөтэй хөрөнгөтэй ч бай, танилтай талтай ч бай, хэнбугай ч хууль зөрчсөн бол хууль араас нь очиж байна.
-  Манай иргэд, албаныхан ардчиллын туршлага судлах гэж гадагш явдаг байсан. Одоо биднээс юм сонсох гэж олон газрын төлөөлөгчид Монголд ирдэг боллоо.
- Нийгэмд олон зүйл эмх цэгцэндээ орж байна.
- Багагүй зүйл цэгцэрч, бас зөв тийшээ салхи эргэж байна.
- Идэх уухын донтнууд эмээл хазааргүй юм шиг аашилдаг. Хууль үйлчилдэг, эс үйлчилдэг давхаргын хямрал дэлбэртлээ даамжирсан үе бас байсан юм шүү. Одоо тийм адгийн ёс зүй бүрэн алга болоогүй ч хорхойтсон баавгай шиг аашилдаг байсан нөхдүүд үүр үүрэндээ шургасан.
- Төрийн албыг үнэлдэг, түүнийгээ ид бах болгодог байдал эцэс болж байна.
- Өмнө нь мөнгөөр бүхнийг шийддэг байсан бол одоо мөнгөөр шийдүүлдэг хэрэг жишээ авах хэмжээнд хүртлээ цөөрч байна.
- Дураараа дургидаг байсан хуучин цагаа санагалзагчид Монголын нийгэмд өрнөсөн шударга ёсны хувьсгалыг зогсооно гэвэл санааны гарз.
- Хүнээ мартаад байна. Энд л бидний гол алдаа байна. Бид уул уурхай, бүтээн байгуулалт, шинэчлэл гээд олон зүйл ярьж байна. Хүнээ хэзээ ярих юм вэ? Хавар цагт махны үнэр ч авч чадахгүй хонож байгаа айл олон байна.
- Монголын төр бүтээгчдээ дэмжихгүй байна. Юм бүтээж, ажил хийж яваа хүнээ дэмжихгүй байна. Энэ бол том алдаа.
- Алба ажлаа эх орныхоо төлөө зориулах, эх орноо алба ашгийн төлөө золих хоёр бол их ялгаатай.
- Төрийн хүн бол “би юунд хүрэх вэ” гэж бодохоос илүүтэй, “улс маань юунд хүрэх бол” гэж сэтгэлээ чилээж явах ёстой.
- Манай төр бүтээгчид, хөрөнгө оруулагчид, хувийн хэвшил рүүгээ амьдрах орон зайгүй болтол нь дайрч байна. Төрийн ийм бодлогод ташуур биш хазаар хэрэгтэй болжээ.
- Бид төрөө засалгүй уджээ.Төр томорч байна. Улам өөхөлж байна.
- Зарим хүн төрийн албанд оронгуутаа, юун туханд хүрэлгүй эрх цуглуулах өвчинд автах юм. Дарга, сайдуудын тушаал захирамж гаргадаг замбараагүй эрхийг хуулиар журамлах ёстой.
- Арван цэцэрлэг барих мөнгө нэг авлигачийн холын хамаатны данснаас гарч ирж байна.
- Хулгай нь илчлэгдсэн, илчлэгдэж байгаа этгээдүүд зүгээр сууж байна гэж бодож байна уу? Тэд амь тэмцэж байна. Тэд хорихоос мөнгөө, гар хөлөө удирдаж байна. Тэд бүгсэн газраасаа бүхнийг зохицуулж байна
- Хуулийн байгууллагын ажилтнуудыг мөнгөөр ч өнгөөр ч дарамталж байна.

Долоо хоногийн шүүмжлэл:  Энэ долоо хоногийн шүүмжлэлийг МАН-ын дарга Ө.Энхтүвшин өрнүүлэв. Тэрээр уг нь чуулганы хуралдаанд үг хээлх гэсэн боловч цөөнхөд тэр эрхийг өгөөгүй юм. Тиймээс түүний чуулганд хэлж чадаагүй шүүмжлэлээс 24tsag.mn онцолж байна.

- Жил хүрэхгүй хугацаанд Монгол Улсын нэр хүнд дэлхийн тавцанд үлэмж доошилж, гадаадын хөрөнгө оруулалт зугтаж, Монголын компаниудын үнэлгээ гадны хөрөнгийн бирж дээр буурсаар байна. Манай экспортын 90 хувийг уул уурхайн салбар дангаараа эзэлдэг. Тэгвэл энэ онд уг салбарт орох гаднын хөрөнгө оруулалтыг өнгөрсөн оны мөн үетэй харьцуулахад 40 гаруй хувиар буурсан, Монголын эрсдлийг өнгөрсөн жилтэй харьцуулахад 25 хувиар ихэссэн гэсэн судалгааны дүн ч гарч байна.
-  Монголд үйл ажиллагаа явуулж байгаа компаниуд энэ жил гадаадын хөрөнгийн бирж дээр ганц ч IPO хийгээгүй нь манай улсад хөрөнгө оруулалтын орчин саармагжсанаас үүдэлтэйг мэргэжлийн хүмүүс онцолж байна.
- Дэлхий дахиныг хамарсан эдийн засгийн хямралаас сэргийлэх, судалгаа дүгнэлт хийх, бодлого хөтөлбөр боловсруулах ажилд Засгийн газар туйлын хойрго хандаж байна.
- Хятадын төрийн тэргүүн Си Жинпинь ОХУ-д айлчилж, БНХАУ, ОХУ төмөр зам, уул уурхайн салбарт хамтран ажиллах чиглэлээр гэрээ байгуулж, нүүрсээ худалдах, худалдан авах яриа хэлцлээ эрчимжүүлж байхад Ерөнхий сайд “Тэр хоёр хүн уулзаа л биз. Манайх өөрсдийнхөө бодлогыг л тодорхойлно, тэгэхийг ч хичээнэ” гэсэн маш хариуцлагагүй, хайнга үгийг хэлээд сууж байна.Хятад руу нүүрс гарах нь бараг зогслоо. Бас оросууд нөгөө сүүлийн хэдэн жил ярьсан төмөр зам барих ажилд орохгүй гэж шийдэж буй юм байна. Түүнчлэн нефтийн хоолойг Монголын нутгийг дайруулахгүйгээр тойруулаад татахаар үндсэндээ тохирчихлоо. Ийм байхад “Тэр хоёр хүн уулзаа л биз” гэж үл тоомсорлож болох юм уу, ядахдаа хоёр том хөрштэйгээ хэл амаа ололцож байж улсын хөгжил урагшилна гэдгийг яагаад ойлгохгүй байна вэ? Ерөнхий сайд аа! Ёс зүй, хариуцлага гэж ярьж байгаа үед ганц энэ үг нь Ерөнхий сайдыг огцруулах хангалттай үндэслэл мөн.
- Нөгөө талаас уул уурхай, ашигт малтмалын салбарын хууль эрх зүйн орчин руу Монгол Улсын Ерөнхийлөгч Ц.Элбэгдорж гүйцэтгэх засаглалтай зэрэгцэн хөндлөнгөөс оролцсоор ирсэн нь хөрөнгө оруулалтыг царцааж, зогсонги байдалд оруулахад тодорхой хэмжээгээр нөлөөлсөн гэж үзэх үндэслэлтэй.
- Монгол Улсын эдийн засагт зогсонги байдал мэдрэгдэж байгаа нь валютын нөөц багасч, төгрөгийн ханш сулрахад нөлөөлж байна.
- Цалин өсөхөд үнэ өсдөг гэж эрх баригчид ярьдаг. Цалин, тэтгэвэр нэмээгүй байхад барааны үнэ өсч байна.
-  2011 онд инфляц 10,2 хувь байсан бол 2012 онд инфляцийн жилийн дундаж түвшин 14,3 хувь болж өссөн байна.
- Яг одоо үхрийн цул махны үнэ 12,000 төгрөгт хүрч байна.
- Хөдөлмөрийн сайд Я.Санжмятав 2014 оноос цалин, тэтгэврийг нэмэгдүүлнэ гэж мэдэгдсэн нь дэндүү хол, амьдралаас тасархай сонсогдож байна.
- УИХ дахь МАН-ын бүлгийн гишүүд 1.5 тэрбум ам.долларын бондтой холбогдуулан Ерөнхий сайд, Монгол банкинд хандан асуулга тавьсан боловч өнөө болтол хариу ирээгүй байна.
- Яам, агентлагуудын явуулж буй үйл ажиллагааг ажиглаж байхад өөрийн хүрээний сонирхлын бүлгүүдийн хооронд найр тавин үгссэн, хуваасан, бусад баялаг бүтээгчдийн үйл ажиллагааг хаасан, боомилсон, хавчиж гадуурхсан, зах зээл, шударга өрсөлдөөний зарчмаас илт гажсан үйл ажиллагаа давамгайлж, баялаг бүтээгчдийн урам зоригийг мохоож байна.
- Өнөөдөр замын тендер зарлахад дотоодын компаниуд оролцохгүй байна. Үүний шалтгаан нь, нэгдүгээрт, төсвийн хөрөнгө оруулалт, төсөв бүрдэлт муу байгаатай холбоотой. Хоёрдугаарт, эдийн засгийн нөхцөл байдал хүндэрч байгаагийн улмаас бизнес эрхлэгчид төсвийн ажил гүйцэтгэхэд эрсдэлтэй гэж үзэж байна. Гуравдугаарт, тендертэй холбоотой авлига их байна.
- Монгол Улсын Ерөнхий сайд Н.Алтанхуяг удаа дараа Үндсэн хууль зөрчлөө.  
- Төрийн албанд халаа сэлгээ, хууль бус томилгоонууд хавтгайрлаа.
-  Энэ засгийн үед хүний эрх, эрх чөлөө хөсөр хаягдлаа.
-  Засгийн газар Үндсэн хуулиар хамгаалагдсан иргэдийн үг хэлэх, хэвлэн нийтлэх, үзэл бодлоо илэрхийлэх эрхэд шууд халдаж эхэллээ.

Долоо хоногийн андуурал: МАН-ын дарга Ө.Энхтүвшин махны үнэ 12000 төгрөгт хүрлээ гэх гэж байгаад 1200 д хүрлээ гэж хэлсэн нь ихээхэн дуулиан болов. Хашир туршлагатай гэгддэг энэ эрхэмийн андуурал түүний нэр хүндэд ихээхэн хохирол үүсгэхээс гадна Ирээдүйн kарьерт нь ч гай тарж мэдэх юм.

Долоо хоногийн мэдэгдэл: Энэ долоо хоногийн дуулиант мэдэгдэл бол Засгийн газрыг огцруулах,ерөнхий сайд Н.Алтанхуяг, Хууль зүйн сайд Х.Тэмүүжин хоёрыг огцруулахаар сөрөг хүчин хөдөлж эхэлсэн явдал боллоо.

Долоо хоногийн гайхширал: Энэ долоо хоногийн гайхшралаар МАХН-аас сонгогдсон эрхэм гишүүн Баянсэлэнгэ МАН-ын жагсаалд оролцож үг хэлсэн явдал боллоо. Олон удаа МАН, МАХН хоёрыг уулзалдаж байгаа гэсэн мэдээлэл гарсан. Түүний энэ үйлдэл тэрхүү мэдээллийн баталгаа болов. Цаашид МАХН, МАН хоёр нэгдэх эхлэл тодорхой болж байгааг тэрээр харууллаа.