Согтуурхаж, хөлчүүрхсэн залуус гэмгүй иргэдийг хохироосон баримтыг сэрэмжлүүлэх үүднээс  дэлгэе.

    Хэдхэн хоногийн өмнө архи ууж хөлчүүрхсэн залуус өөрсдийнхөөрөө аашилж, гэм зэмгүй хүмүүсийг өдөж, нүд рүү нь газ цацаж гэмтээсэн хэрэг гарчээ. Тодруулбал, Сүхбаатар дүүргийн I хорооны нутаг дэвсгэр болох "Сарны титэм" худалдааны төвийн ойролцоо иргэн Д автомашинтайгаа явж байхад  зам дээр гэнэтхэн согтуу эр гарч ирсэн байна.  Д ч яаравчлан зогсож, машиных нь урд хөндөлдөх согтуу эрийг холдохыг сануулжээ.   Өнөөх залуу  "Чаддаг юм бол намайг мөргөчихөөч ээ" гээд гуйван зогссон байна. Ингээд түүнийг холдохыг хэсэг хүлээж байгаад "Яасан аминаасаа уйдсан амьтан бэ, алив чи холд доо" гээд  Д согтуу эрд хандан хэлжээ.  Холдохгүй байхаар нь арга ядаад Д машинаасаа бууж согтуу эрийг холдуулсан байна. Тэгтэл цаанаас хэсэг залуус гарч ирээд  "Уучлаарай ах аа. Манай найз байгаа юм аа" гээд түүнийг аваад явсан байна.

    Ингээд Д машиндаа эргэн суух гэтэл түүний машины ард зогсч байсан "Соната" маркийн автомашинаас  дуут дохио өгсөн байна.  Д ч уг машины жолоочоос  уучлалт гуйгаад машин руугаа ухасхийжээ. Гэтэл "Соната" маркийн автомашины салхины шил доошилж дотроос нь үл таних этгээд "Хөөе гөлөг өө, замаас зайлаач ээ" гэж өндөр дуугаар дээрэнгүй хашгирсан байна. "Одоохон" гээд Д машиндаа суутал арынх нь машинаас энгийн хувцастай, халамцуу залуу бууж ирээд "Алив бичиг баримтаа шалгуул" гэж шаарджээ.  "Би яахаараа чамд бичиг баримтаа өгөх ёстой юм бэ" гээд  Д мэдээж эсэргүүцэл үзүүлж.  "Чи муу хэнтэй харьцаж байгаагаа мэдээрэй" гэж арын машинаас ирсэн халамцуу эр томорсон байна. Д ч машинаасаа буутал арын машинаас бас нэг согтуу залуу гарч ирж гэнэ. Нэг нь Д-гийн нүүр рүү шуудхан газ цацчихжээ. Хамаг юм харанхуй оргиж, Д-гийн нүд нь айхавтар хорсон газар унасан байна. Тэгтэл өнөөх залуусын нэг нь түүний нүүр рүү өшиглөчихөж. Нүд рүүгээ газ цацуулаад, биеэ хамгаалах чадваргүй байсан Д ийнхүү бусдад зодуулжээ. Зодсоныхоо дараа өнөөх хоёр залуу ум хумгүй зугатжээ.  Гэсэн ч нэг согтуу нь өнөөх залуу руу газ цацахдаа найзынхаа нүд рүү ч бас цацчихсан байж. Энэ үед түүнийг Д-тэй хамт машинд нь явж байсан бүсгүй араас нь хэд харайгаад л бариад авч. Бүсгүй түүнийг Д-гийн машинд суулгасан байна. Харин энэ үед танхай нөхдүүдийн сууж явсан "Соната" маркийн машин ухасхийн хөдлөхөөр нь жолоочийг зогсоох санаатай Д-гийн хамт яваа бүсгүй уг машины арын шил рүү цохитол цуурч хагарчээ.  Бүсгүй ч Д-гийн машинд сууж шуудхан цагдаагийн газар руу хөдөлсөн байна. Тэднийг цагдаагийн газарт очоод удаагүй байтал араас нь өнөөх "Соната" маркийн автомашин ирсэн гэнэ. Жолооч нь нэг согтуу залууг дагуулсаар цагдаагийн газар руу ороод ирж. Тэрээр "Би таксинд явдаг хүн байгаа юм аа. Гурван залуу гараа өргөхөөр нь аваад явж байтал ийм юм болчихлоо. Нэг нь зугатсан. Нөгөө нь энэ хоёр хүнтэй хамт ирж. Харин гурав дахийг нь би авчирлаа. Хэрэг болох үед машинаасаа буугаагүй юм. Энэ эмэгтэй миний машины шилийг хагалчихаар нь та нарын араас энэ залууг дагуулаад хүрээд ирлээ" гэжээ. Ийнхүү архи ууж овлигогүйтсэн залуучуудаас болж гэм зэмгүй байсан хүмүүс эрүүл мэнд, эд хөрөнгө, цаг хугацаагаараа хохирчээ. Таксины жолоочийн машины шилний хагархайн нөхөн төлбөрийг Д маргааш нь барагдуулсан байна. Харин өөрөө танхай этгээдүүдэд зодуулсан гомдлоо цагдаагийн газарт тавьжээ. Д-гийн биеийн байдал ямар байгааг лавлахад "Уруул язарсан байна. Миний нүд рүү цацсан газ Монголд байдаггүй гэж мэргэжлийн хүмүүс ярьж байна билээ. Нүд рүүгээ газ цацуулах их өвдөж, хорсдог юм байна. Цагдаагийн газарт ирсний дараа ч нүд юм харахгүй байсан. Тэгтэл цагдаагийн ажилтан усаар угаачих гэж зөвлөхөөр нь угаатал улам хорсож өвддөг юм билээ. Харин гадаа салхинд гартал гайгүй болсон шүү" гэв. Одоогоор энэ хэргийг Сүхбаатар дүүргийн цагдаагийн хэлтэст шалгаж байгаа юм.

Энэ бол гадуур элбэг тохиолддог энгийн үзэгдэл байх л даа. Гэвч иймэрхүү үйл явдлыг сонссон ч сонссоогүй юм шиг, мэдсэн ч мэдээгүй юм шиг өнгөрөөсөөр байх гэж үү. Дур мэдэн зоргоороо авирлаж байгаа зарим нэг хүнээс болж мөрөөрөө явж байсан иргэд хохироод үлддэгийн том жишээ энэ.