Ерөнхий сайд Н.Алтанхуяг өнгөрсөн ням гаригийн өглөө Бурхан Халдун ууланд авиралтаа эхлэн үдээс хойш бууж ирэх төлөвлөгөөтэй байсан ч цаг агаар гэнэт муудсанаас болж цасанд боогдон сураггүй болж сандаргасан.

Өчигдөр өглөө Ерөнхий сайд Н.Алтанхуягийг эрж хайх ажиллагааг эхлүүлж үдээс өмнө олсон билээ. Гэсэн ч түүнтэй хамт ямар хүмүүс явсан нь тодорхойгүй байсан. Харин ерөнхий сайдтай хамт хүү Н.Тулгаа, Засгийн газрын хэрэг эрхлэх газрын дарга Ч.Сайханбилэг, дэд дарга Г.Дэнзэн, Ерөнхий сайдын зөвлөх Л.Гансүх, гэрэл зурагчин, АН дахь “Алтан гадас” фракцын залуус мөн археологичид, “JCI” олон улсын байгууллагын гишүүн залуус, Төв, Хэнтий аймгийн зарим дарга нар явжээ. 

“Гараг” студийн захирал Г.Бадамсамбуу Ерөнхий сайдын энэхүү аяллын санааг гаргасан байна. Сураг сонсоход, тэрбээр “Чингисийн онгон Бурхан Халдун” ууланд байгааг манай судлаачид бараг тогтоочихоод байна. Засгийн газрын тэргүүний хувьд бодит байдалтай танилцах нь зөв гэж зөвлөжээ.

Ингээд л Ерөнхий сайд салхинд гарангаа Чингис хааны онгоныг үзчих санаатай Бурхан Халдуны зүг зорьсон аж.  70 орчим хүнтэй хотоос хөдөлсөн аяллын баг Хэнтийд очиж 100 хүнтэй болж бүл нэмсэн байна. Аяллын багийн эрчүүд ням гаригийн өглөө далайн түвшнээс дээш 2361.5 метр өндөрт орших Бурхан Халдун уулын оргилд гарахаар хөдөлжээ. “Уулчид” бага үдийн хэдийд уулын оргилд хүрч тэндээ арц хүж уугиулж, хадаг яндар зүүж, зураг хөргөө татуулсаар хоёр цаг саатжээ. Багийнхныг уулнаас буух гэтэл цас орж, нүүр нүдгүй шуурчээ. Ингээд шөнө болж урдах замаа харж чадахаа байсан эрчүүд тэндээ хоножээ.

Үүрээр Ч.Сайханбилэг сайд болон зарим хүмүүсийн хацар хайрагдсаныг эс тооцвол аяллын багийнхан эсэн мэнд хоносон гэнэ. Ерөнхий сайдын багийнхныг ууланд хоноход -17 хэмийн хүйтэн байсан бөгөөд салхи намдах үед утасны сүлжээ орсон учраас тэд шөнийн 01 цагийн үед “Бид төөрчихлөө” гэж Хэнтийн аймгийн онцгойгийнхонд мэдэгджээ. Гэсэн ч тэднийг онцгойгийнхон биш хилчид олсон  байна.

Эрлийн ажиллагаанд зэвсэгт хүчний 303 дугаар ангийн МИ-171E нисдэг тэрэг, найман автомашиныг эрэлд ашигласан байна. Харин хилийн цэргийнхэн 10.00 цагийн үед Ерөнхий сайдын багийнханыг олжээ. Аяллын багийнханы дунд “Аdidas” брэндийн албан ёсны борлуулагч “BTF” компанийн захирал Л.Огторгуй байршил тогтоогчтой явсан нь ийн хэрэг болжээ.

30 орчим сая төгрөг зарлагдсэн нисдэг тэргээр Ерөнхий сайд,  түүний хүү болон Ч.Сайханбилэг нарыг нийслэлд авч ирэхээс өөр үүрэг гүйцэтгээгүйг тэнд байсан хүмүүс ярьжээ. Тэд “Эрлийн багийнхан ирээгүй байсан ч эсэн мэнд очихоор байсан” гэж ярьж байгаа юм. Ийнхүү сонин хачин, шүүмжлэлээр дүүрэн ерөнхий сайдын аялал өндөрлөв.

Харин Ерөнхий сайд өөрийн твиттер хуудсаар дамжуулан Бурхан Халдун ууланд төөрсөн сэтгэгдлээ бичжээ. Тэрээр "Өчигдөр Бурхан Халдун ууландаа гараад буухдаа цасан шуурганд 53 хүнтэй төөрөв. Долоон цаг цас ухаж зам гаргав. Шөнө модон дотор гал түлж хонов. Өглөө 06.00 цагт хунгар цасан дундуур дөрвөн цаг явж байтал Онцгойгийнхон ирлээ. 71 хүний зарим нэгнийнх нь хацар хайрагдсаныг эс тооцвол бүгд шалгалтыг сайн давлаа. Бурхан Халдун ууландаа өдөр бүр залбирмой. Бурхан Халдуны аврал, багийн гишүүдийн зүтгэлээр, та бүхний залбирлаар хацраас бусад нь зүгээр" гэжээ.