УИХ дахь Ардчилсан намын бүлгийн хурал боллоо. Хурлын дараа АН-ын бүлгийн дарга Д.Эрдэнэбат мэдээлэл хийсэн юм. Тэрбээр ярихдаа "Бүлгийн хуралдаан өчигдөр болох байсан ч Засгийн газраас  тодорхой мэдээлэл авах шаардлага байсан. Мөн Ерөнхий сайд Н.Алтанхуяг Бурхан халдун уул руу яваад 70 хүний хамтаар цасанд боогдсон учраас Хууль зүйн сайд Х.Тэмүүжин Хэнтий аймгийг зорьж шуурхай үйл ажиллагаа явуулсан. Эдгээрээс шалтгаалж ээлжит хуралдаанаа хойшлуулж өнөөдөр хийлээ" гэлээ.

Энэ удаагийн хуралдаанаар гишүүд Засгийн газрын үйл ажиллагаатай холбоотой хэд, хэдэн чухал асуудлыг хөнджээ. Үүнд гадаадын хөрөнгө оруулалт буурсан нөхцөл шалтгаан, Монголын эдийн засгийн өнөөгийн байдлын талаар Ерөнхий сайд Н.Алтанхуяг мэдээлэл хийсэн байна. Ингэхдээ 2011-2012 онд буюу сонгуулийн жилд Монголын эдийн засгийн нөхцөл байдал ямар байсан талаар Ерөнхий сайд мэдээлэл өгчээ. МАН-ыг олонхи байхад буюу 2011-2012 онд Тавантолгой 350 сая ам.доллар, "Эрдэнэт" үйлдвэр 170 сая ам.доллар, Хөгжлийн банк  262 сая ам.доллар, Оюутолгойгоос 250 сая ам.долларын зээл авчээ. Өнгөрсөн онд авсан нийт 1.4 тэрбум ам.долларын зээлийг зөвхөн халамжид зориулсан байна. Энэ зээлийн хүүг төлөхийн тулд улсын эдийн засаг сүйрэх хэмжээнд хүрээд байгааг Ерөнхий сайд мэдээлжээ. Тиймээс "Чингис" бонд гаргаж 1.5 тэрбум ам.доллар босгосон нь эдийн засагт үүсээд буй нөхцөл байдлыг сайжруулсан гэдэг дүгнэлтэд АН-ын бүлэг хүрсэн байна. Энэ мөнгийг босгоогүй бол эдийн засаг элгээрээ хэвчтих байсан учрыг ч тайлбарласан байна.

 “Эрдэнэт” үйлдвэрийн зэсийн үнэ өсөх бүрийд зардал нь яагаад өсөв гэдгийг нягтлан шалгах ёстой гэж үзжээ. Мөн ОХУ-аас Ерөнхий сайдад төмөр замын асуудлаар захидал бичин илгээхэд яагаад “Өнөөдөр” сонинд нийтлэгдсэн зэрэг асуудлыг цагдаа, тагнуулын байгууллагынхан шалгах ёстой гэж үзжээ.

Мөн бүлгийн дарга Д.Эрдэнэбат энэ үеэр Засгийн газрыг огцруулах тухай худлаа мэдээлэл ихээр гарч буйд эмзэглэж байгаа гэдгээ илэрхийлжээ. Үүнтэй холбоотойгоор  Хууль зүйн сайд Х.Тэмүүжинд гадуур тархаад байгаа хов жив хөөсөн асуудлуудыг нэг тийш болгох үүрэг даалгавар өгчээ. Мөн одоогийн Засгийн газар тогтвортой ажиллах шаардлагатай. Хэн нэгний тоглолтоос болж Засгийн газар огцрох ёсгүй гэж үзсэн тухай Д.Эрдэнэбат мэдэгдсэн юм. 

Үүнээс гадна хууль сахиулагчдын эрх зүйн байдалтай холбоотой 14 багц хуулийн эхний зургааг энэ долоо хоногт УИХ-д өргөн барих гэж байгаа. Үүнийг АН-ын бүлгийн гишүүд хэлэлцээд дэмжжээ. Мөн Ерөнхийлөгчийн сонгууль болон УИХ-ын сонгуулийн дахин санал хураалттай холбоотой УИХ-ын тогтоолын төслийг хэлэлцэх нь зөв гэж үзлээ.