Хуралдаан 13.25 цагт Төрийн ордны “Б” танхимд хуралдав. Хуралдааныг Улсын Их Хурлын гишүүн, Төсвийн байнгын хорооны дарга Ц.Даваасүрэн удирдав.

-“Дахин санал хураалтын зардал батлах тухай” УИХ-ын тогтоолын төсөл

Хуралдаанд Сонгуулийн ерөнхий хорооны дарга Ч.Содномцэрэн, Сангийн яамны Төсвийн зарлагын хэлтсийн дарга О.Хуягцогт, Сонгуулийн ерөнхий хорооны Ажлын албаны дарга Д.Баяндүүрэн, Сонгуулийн ерөнхий хорооны Захиргаа, санхүүгийн хэлтсийн ахлах референт Ж.Оюунгэрэл, Улсын бүртгэлийн ерөнхий газрын дарга Ц.Пүрэвдорж, Улсын бүртгэлийн ерөнхий газрын Мэдээллийн технологийн газрын дарга Б.Чимэддорж, Улсын бүртгэлийн ерөнхий газрын Санхүү, бүртгэлийн хэлтсийн дарга Б.Өүлэн-Үжин, Төсвийн байнгын хорооны ахлах зөвлөх Ё.Мөнхбаатар, зөвлөх Ё.Энхсайхан, референт Ц.Батбаатар нар байлцав.

Төслийн талаарх танилцуулгыг Сонгуулийн ерөнхий хорооны дарга Ч.Содномцэрэн танилцуулав.

Тогтоолын төслийн хэлэлцүүлгийн явцад Улсын Их Хурлын гишүүд Сонгуулийн ерөнхий хороо болон Сангийн яамны холбогдох албан тушаалтнуудаас дахин санал хураалтад зарцуулах зардлын тооцоо, үндэслэлийн талаар тайлбар сонсон төслийг зарчмын хувьд дэмжиж, дахин санал хураалтад зарцуулахаар тооцсон 397.4 сая төгрөг, Монгол Улсын Ерөнхийлөгчийн сонгуулийн радио, телевизийн сурталчилгааны мониторинг хийхэд шаардлагатай 91.0 сая төгрөгийн зардлуудыг 2013 оны төсөвт тусгагдсан зардлын нийт дүндээ багтаан зарцуулахыг Байнгын хорооны хуралдаанд оролцсон гишүүдийн олонх дэмжсэн болно.

Төсвийн байнгын хорооны санал, дүгнэлтийг Төрийн байгуулалтын байнгын хороонд Улсын Их Хурлын гишүүн Н.Батбаяр танилцуулахаар тогтлоо.

Хоёр.”Монгол Улсын Ерөнхийлөгчийн сонгуулийн зардлын хэмжээг батлах тухай” Улсын Их Хурлын тогтоолын төсөл

Төслийн талаарх танилцуулгыг Сонгуулийн ерөнхий хорооны дарга Ч.Содномцэрэн танилцуулав.

Тогтоолын төслийг Байнгын хорооны хуралдаанаар хэлэлцээд Монгол Улсын Ерөнхийлөгчийн сонгуулийн тухай хуулийн 10 дугаар зүйлийн 10.4 дэх заалтын дагуу Монгол Улсын 2013 оны төсвийн тухай хуулинд сонгууль явуулахад зориулан 17.2 тэрбум төгрөг баталсан тул энэ тогтоолын төслийг хэлэлцэх шаардлагагүй гэж үзлээ.

Төсвийн байнгын хорооны санал, дүгнэлтийг Төрийн байгуулалтын байнгын хороонд Улсын Их Хурлын гишүүн Н.Батбаяр танилцуулахаар тогтлоо.

Гурав. Улсын Их Хурлын 2013 оны хаврын ээлжит чуулганы хугацаанд Байнгын хорооноос хийх ажлын төлөвлөгөөнд Байнгын хорооны гишүүдээс саналыг авч тусган батлахаар тогтов.

Хуралдаан 14.05 цагт өндөрлөв.