Гадаадын өндөр хөгжилтэй орнуудад магистрантур, докторантурт төрийн сангийн тэтгэлгээр суралцуулна хэмээн иргэдийг залилсан Д.Амгаланбаатарт холбогдох хэргийг Сүхбаатар дүүргийн шүүх шийдвэрлэжээ.

Түүнд Сүхбаатар дүүргийн Прокурорын газрын хяналтын прокурор Д.Цэнгэлмаа 12 жил зургаан сарын хугацаагаар хорих ял оноож, иргэдэд учруулсан хохирлыг нөхөн төлүүлэх санал гаргасан байна. Харин шүүх бүрэлдэхүүн чанга дэглэмтэй ангид 11 жил хорих ял оноохоор шийдвэрлэлээ.

Тэрбээр иргэдийг 100 хувийн тэтгэлгээр АНУ, Англи, БНСУ, Японд суралцуулах зар гаргаж, иргэдээс 10-20 мянган ам.доллар авч байжээ. Хүмүүсийг итгүүлэхийн тулд Боловсрол, соёл, шинжлэх ухааны сайд асан Ё.Отгонбаярын гарын үсгийг дуурайлган зурж, “Төрийн сангийн тэтгэлэгт хамрагдахыг зөвшөөрлөө” гэсэн бичиг бүхий хуурамч баримт үзүүлж байсан нь нотлогдсон юм. Д.Амгаланбаатар ийм замаар 43 хүнд 450 сая гаруй төгрөгийн хохирол учруулсан нь мөрдөн байцаалтаар тогтоогдсон байна.