Шинэчлэлийн Засгийн газрын сайдууд долоо хоног бүрийн лхагва гаригт салбарынхаа асуудлаар сэтгүүлчдэд нээлттэй мэдээлэл хийдэг. Энэ долоо хоногт Барилга, хот байгуулалтын сайд Ц.Баярсайхан нээлттэй ярилцлага хийлээ.

Шинэчлэлийн Засгийн газрын сайдууд долоо хоног бүрийн лхагва гаригт салбарынхаа асуудлаар сэтгүүлчдэд нээлттэй мэдээлэл хийдэг. Уламжлал ёсоор өнөөдөр Барилга, хот байгуулалтын сайд Ц.Баярсайхан нээлттэй ярилцлага хийлээ.          Уулзалтаар ярьсан асуудлаас хамгийн  анхаарал татсан нь “100 мянган айлын орон сууцны хөтөлбөр”-ийн хэрэгжилтийн явцын талаарх мэдээлэл байв.

    Өмнөх Засгийн газар сонгуулийн амлалтаасаа болж зургаан хувийн хүүтэй орон сууцны зээлийг иргэдэд олгож эхэлсэн. Үүнээс болж иргэд хохирч, жагсаал, цуглаан хийн Засгийн газарт шаардлага хүргүүлээд байгаа. Засгийн газрын гишүүд солигдох бүрт орон сууцны хөтөлбөр өөрчлөгддөг. Энэ байдлыг хэвийн байлгахын тулд БХБЯ-наас иргэдийг орон сууцжуулах нэгдсэн хөтөлбөр бий болгохоор ажиллаж байгаа аж. Мөн иргэдийг хохироохгүйн тулд зургаан хувийн зээлийн хохирогчдын асуудлыг шийдвэрлэхээр ажиллаж байгаагаа  салбарын сайд онцлов.

Цаашид БХБЯ-аас бизнесийн үйл ажиллагаанд төрийн оролцоог багасгах, төрөөс үзүүлдэг үйлчилгээний шат дамжлага хүнд суртлыг арилгах чиглэл барьж ажиллах юм байна. Тиймээс зарим тусгай зөвшөөрлийг төрийн бус байгууллагад шилжүүлжээ. Тухайлбал барилгын ажил эхлүүлэх, үргэлжлүүлэх тусгай зөвшөөрлийг олгоход 200 гаруй хоног зарцуулдаг байсан бол 30-35 хоногт багтаан олгодог болсон байна. Барилгын салбарын хуулийн шинэчлэлийн хүрээнд тус яам үйлчилгээний нэг цэгийн үйлчилгээг бий болгоход анхаарч буй аж.

    Мөн хөдөлмөрийн аюулгүй ажиллагаанд “Цэнхэр карт хөтөлбөр” боловсруулж гаргахаар болжээ. “100 мянган айлын орон сууц” хөтөлбөрийн хүрээнд нийт 29 мянган иргэн орон сууцны хөнгөлөлттэй зээлд хамрагдаж, эргэн төлөлт нь хэвийн явж буйг Ц.Баярсайхан сайд онцолсон. Цаашид иргэдийг орон сууцжуулах хөтөлбөрийг үргэлжлүүлэх бөгөөд Засгийн газраас 7, 8, 9 хувийн хүүтэй зээлийг олгох асуудлыг хөндөх юм байна. Уг асуудлыг ирэх долоо хоногийн Засгийн газрын хуралдаанаар шийдвэрлэх аж. Үүнийг шийдэхдээ инфляци, зах зээлийн үнэд нөлөөлөхгүйгээр хүүгийн хувийг тогтоох судалгааны ажлыг салбарын яаманд даалгажээ.
   
    Түүнчлэн тус яамнаас барилгын материалыг хөнгөлөлттэй үнээр нийлүүлэхээр арматур, цемент нийлүүлдэг аж ахуйн нэгжид хөнгөлөлттэй зээл олгох гэрээнд гарын үсэг зуржээ. Ингэснээр барилгын материалын үнэ нэмэгдэхгүй байх, одоогийн байгаа ханшийг тогтворжуулах юм байна.

Орон сууцны хөтөлбөрийн хүрээнд энэ онд 17 хорооллыг шинээр барихаар төлөвлөж, дэд бүтцэд  нь 200 тэрбум төгрөг төсөвлөжээ. Түүнчлэн нийслэлийн төсвөөс 40 орчим тэрбум төгрөг төсөвлөж, нийт 240 тэрбум төгрөгөөр дэд бүтэц шийдэгдээгүй барилгын орон сууцны асуудлыг шийдвэрлэхээр болсон байна. Хөнгөлттэй үнээр борлуулах орон сууцыг  Нисэхэд барьж буй юм.