АНУ-ын Бостон хотод өчигдөр террорист халдлага болохоос өмнөхөн Цагаан  ордонд сэжигтэй захидал ирсэн тухай мэдээлэл цацагдаж байсан юм. Албаныхан шалгаж байгаа тул дэлгэрэнгүй мэдээлэл өгөх боломжгүй гэж байв. Тэгвэл өчигдөр Миссиссиппи мужаас сонгогдсон сенатор Рожер Викерт хаягласан захидлаас ricid гэх үхлийн хортой бодис илэрсэн тухай албаны хүмүүс мэдэгдснийг CNN.com  уламжиллаа.
  Буцах эзэнгүй захидлыг Цагаан ордны хамгаалалтын алба хоёр удаа шалгахад хоёуланд нь хорт бодис илэрсэн эерэг дүн гарчээ. Тиймд ордон доторх шуудангийн үйлчилгээг яаралтай зогсоож Мэрланд дахь лабораторид шинжлүүлэхээр илгээсэн байна. 

   Ricid нь ургамлын гаралтай хор бөгөөд хадаасны толгойн чинээ хэмжээтэй байхад насанд хүрсэн хүний аминд хүрдэг аж. Энэ бодисыг гаргаж авахад хялбар мөн хямд өртөгтэй байдаг ч захидалд илэрсэн бодис нь илүү зэвсгийн зориулалттай байсан гэж шинжээчид үзжээ. 1978 онд Болгарын тэрс үзэлтэн гэгдэж байсан Гиоргий Марковыг Лондон хотод автобус хүлээж байхад нь ricid шингээсэн шүхрийн төмөр үзүүрээр хатгаж амийг нь бүрэлгэж байсан түүх байдаг. Тэрбээр дөрвөн өдрийн дараа амиа алдсан юм. Тиймд эзэнгүй захидлын асуудалд Цагаан ордноос тун анхаарч байна. Энэ захидал гурван хүн амиа алдсан Бостон хотын дараалсан дэлбэрэлттэй холбоотой юу гэсэн асуулт мөн нээлттэй үлдэж байгаа юм. 
                                                                                                                                                                                                                                                              Т.Гэрэл