Хойд Солонгосын тухай америк зохиолчийн ном энэ жилийн Пулитцерийн шагнал авчээ. Станфордын Их сургуулийн багш Адам Жонсоны “The Orphan Master"s Son” нэртэй ном сэтгүүл зүйн салбарын шилдгүүдэд гардуулдаг Пулитцарын шагналын уран зохиолын төрөлд оны шилдэг номоор шалгарсан байна. Зохиолч Адам Жонсон номоо бичихий тулд Хойд Солонгост амьдарсан ч зохиолын дүр болон зарим үйл явдлыг өөрийн төсөөллөөрөө бичжээ. Учир нь Хойд Солонгост гадаадын иргэнтэй ойр дотно байх нь хориотой тул зохиолын баатраа олж чадаагүй байна.
 
   Уг номын гол дүр нь Пак Жун До гэдэг эцэг, эхгүй өссөн Хойд Солонгосын орчин цагийн иргэн юм. Номын бас нэгэн чухал дүр болох командлагч Га-гаар Хойд Солонгосын удирдагч асан Ким Чен Ирийг төлөөлүүлсэн гэж зохиогч өөрөө тайлбарлажээ. 450 хуудас бүхий  “The Orphan Master"s Son” нь “Жун Догийн намтар”, “Командлагч Га-гийн өчил” гэсэн хоёр хэсэгтэй. Эхний бүлэгт Жун До Засгийн газарт сураггүй болсон япон хүүхдүүдийн асуудлыг хариуцан ажиллах бөгөөд АНУ руу ажлын шугамаар явж буйгаар төгсдөг байна. Тэгвэл дараагийн бүлэг эхлэхэд Жун Дог командлагч Га-гийн тушаалаар баривчилдаг аж. Тэгмэгц Га-гийн үнэн царайг мэдсэн Жун До оргон зайлж Сун Мүн гэх алдартай жүжигчин эмэгтэйн нөхрийн дүрээр амьдрах болжээ. АНУ болон Хойд Солонгосын хооронд цөмийн зэвсгийн асуудал хурцдаж, дэлхийг тойрон аялаж байсан америк эмэгтэйг солонгосчууд саатуулсан хэрэг манддаг байна. Түүнийг суллах төлөвлөгөөнд Жун Дог оролцсоноор үйл явдал өрнөдөг аж.

   Пулитцерийн шагналын шүүгчид энэ номыг “Уншигчдыг тоталитар дэглэмтэй Хойд Солонгосоор  сонирхолтой аялалд хөтөлж, хүмүүсийн зүрхэнд хүрэхээр бүтээл болсон” гэж дүгнэжээ. Гэвч зохиолч Адам Жонсоныг Хойд Солонгос орныг бүхэлд нь хар бараанаар харуулсан гэж шүүмжлэгчид байгаа юм.
  
                                                                                                                                                                                                                                                           Т.Гэрэл