Одоогоос хэдэн жилийн өмнө Хадгаламж банканд ажилладаг Ц.Чимэдцэрэн гэх залуу 14 тэрбум төгрөгөөр мөрийтэй тоглоод баригдсан нь ихээхэн дуулиан дэгдээсэн юм. Хамгийн гол нь Ц.Чимэдцэрэн тухайн үеийн МАСЗХ-г санхүүжүүлсэн хэмээн хардагдаад энэ нь батлагдаадгүй. Гэхдээ л тухайн үеийн МАСЗХ-ныхон ихээхэн тансаг байсныг олон хүн гэрчилдэг. Энэ асуудлаас болж У.Хүрэлсүх, Г.Занданшатар нар дээлээ нөмрөх шахаад сураг алдарсан.
Тэгвэл одоо У.Хүрэлсүхийн Зүүний хүчний холбоог төрийн болоод төсөл тендерийн мөнгөөр санхүүжүүлсэн байж магадгүй гэж үзэн ЭМЯ-ны Төрийн нарийн бичгийн дарга асан Н.Түмэндэмбэрэлийг бариад хорьчихлоо. Энэ эрхэм Зүүний хүчний холбооны санхүүжүүлэгч, идэвхитэй дэмжигч гэгддэг юм байна. Угаасаа энэ яамны шугамаар хэрэгждэг төсөл, тендерийг У.Хүрэлсүхийн залуус зохицуулж байсан бололтой. Үүнийг нь эртнээс мэдэж байсан АН-ынхан халуун мөрөөр нь орлоо гэж эх сурвалж тайлбарлав.  
Ингэж хардах учир шалтгаан байгаа бололтой. ЭМЯ-ны сайд асан Н.Хүрэлбаатар цөөнгүй жил төрийн нарийнаар ажилласан. Тэгэхдээ л У.Хүрэлсүхийн залуусаас өөртөө татаж байсан гэнэ. Сайд асан Н.Хүрэлбаатар ч гэсэн У.Хүрэлсүхийн баруун нь биш юмаа гэхэд зүүн гар нь байсан гэдэгийг олон хүн гэрчилнэ. Түүнийг Төрийн нарийнаар ажиллаж байхад У.Хүрэлсүх л дэмжиж сайд болгосон. Ингээд сайд болсон Н.Хүрэлбаатар өөрийнхөө оронд Санхүү хөрөнгө оруулалтын газрын дарга байсан Н.Түмэндэмбэрэлийг томилжээ. Энэ томилгоонд ч У.Хүрэлсүх оролцжээ. Ийнхүү монголын ард түмний эрүүл мэндийн бодлогыг тодорхойлж олон төсөл хөтөлбөр хэрэгжүүлдэг яам У.Хүрэлсүхийн залуусын жолоодлогоор яваад бурууджээ. Ганц худагт хоригдож байгаа Н.Түмэндэмбэрэлийг олон тэрбумын хэрэгт холбогдуулан шалгаж эхэлсэн. Түүнийг энэ их мөнгийг дур мэдэж ганцаараа зарцуулаагүй, бас ганцаараа том толгойлж төсөл, тендер будилаантуулаагүй гэж хардаж байгаа бололтой. Уг асуудалтай нь холбогдуулан сайд асан Н.Хүрэлбаатар улмаар У.Хүрэлсүх түүний залуусыг шалгах эсэх талаар холбогдох байгууллагууд ярилцжээ.  
Юутай ч гэсэн У.Хүрэлсүхийн тэргүүлдэг зүүний хүчний холбооны нэгэн том санхүүжүүлэгчийг эрх баригчид барьж хорилоо.  
Үүнээс гадна У.Хүрэлсүхийн удирдлагад ажилладаг хоёр ч залууг Эрдэнэт үйлдвэрийн асуудалтай холбон шалгаж магадгүй гэсэн мэдээлэл тарж эхлээд байна. Энэ хоёр эрхэмийн нэрс одоохондоо тодорхойгүй. Ямар ч байсан У.Хүрэлсүхийн удирдлагад ажиллаж байсан бас түүний дэмжлэгээр том албанд томилогдсон нөхөд гэж эх сурвалж мэдээлэв. Бүр Эрдэнэт үйлдвэрийн удирдлагад ажилладаг байсан, ажиллаж байгаа гэх мэт зөрүүтэй мэдээлэлүүд ч байна. Үнэхээр У.Хүрэлсүхийн дэмжлэгээр Эрдэнэт үйлдвэрийн удирдлагад томилогдсон хүн байдаг эсэхийг улс төрийн хүрээнийхэн л хэлж чадна. Хэрэв энэхүү мэдээлэл үнэн бол удахгүй нэр нь тодорч ээлжит дуулиан дэгдээх нь гарцаагүй юм.  
Ийнхүү эрх баригчид У.Хүрэлсүхийн удирдлагад ажилладаг байсан Зүүний хүчний холбооны залуусаас сонирхож эхлээд байна.