ШӨХТГ-ын дарга О.Магнай хэвлэлийн хурал хийлээ. Тэрээр цаг үеийн асуудлаар сэтгүүлчидтэй ярилцсан ба үүнд анхан болон давж заалдах шатны шүүхээс нефть импортлогч найман компанид ШӨХТГ-аас ногдуулсан нийт 17 тэрбум төгрөгийн торгуулийг албадан төлүүлэх шийдвэр гаргасны дагуу Нийслэлийн шүүхийн шийдвэр гүйцэтгэх албанаас хохирлыг барагдуулах арга хэмжээ авч эхэлсэн тухай онцлон хэллээ. Ноогдуулсан торгуулийн хэмжээний хувьд, "Сод монгол" компани хоёр тэрбум, "Ник" зургаан тэрбум, "Ойн бирж" 250 сая, "Магнай трэйд" дөрвөн тэрбум, "Шунхлай" 800 сая, "Жаст-Ойл" 1.8 тэрбум, "М-Ойл" 924 сая, "Петрожамп" 580 сая гэсэн торгуул тавьжээ.

Одоогоор нефть импортлогч “М-Ойл”, “Ойнбирж”, “Магнай трейд” компаниуд мөнгөн торгуулийн эхний хэсгийг барагдуулж эхэлсэн байна. Тухайлбал, "М-Ойл" эхний ээлжинд улсын төсөвт 25 сая төгрөгийг өгсөн байгаа аж.

Шүүхийн шийдвэрийг биелүүлэх хүрээнд Нийслэлийн шүүхийн шийдвэр гүйцэтгэх албанаас “Шунхлай” компанийн шатахуун түгээх зургаан станцыг битүүмжилж, 19 тээврийн хэрэгслийг замын хөдөлгөөнд оролцохыг хоригложээ. Мөн “Петрожамп” компанийн тээврийн хэрэгсэл, “Магнай трейд”-ийн Хан-Уул, Сүхбаатар дүүрэгт байрлалтай дөрвөн үл хөдлөх хөрөнгө, шатахуун түгээх гурван станц, оффисийн зориулалттай 12 давхар барилгыг битүүмжилж, 30 тээврийн хэрэгслийг замын хөдөлгөөнд оролцохыг хориглосон байна.

Түүнчлэн “М-Ойл” компанийн Баянзүрх дүүрэгт байрлалтай 5500 кв.метр талбай бүхий газар, мөн Lexus-470, Lexus-570 маркийн автомашиныг битүүмжилж, “Ойнбирж” компанийн Сүхбаатар, Баянзүрх, Налайх дүүрэгт байршилтай шатахуун түгээх дөрвөн станцын захиран зарцуулах эрхийг гуравдугаар сарын 1-нээс түдгэлзүүлжээ.

Мөн "Шунхлай трейдинш" ХХК-ийн 1, 6, 7, 11, 12, 14 хороонд байрлах зургаан шатахуун түгээх станцыг битүүмжлэн 19 тээврийн хэрэглийн шилжилт хориг тавьжээ.