Энэ сарын эхээр Бурхан ууланд төөрсөн Ерөнхий сайд Н.Алтанхуяг болон түүний багийнханыг аврах гэж 14 сая гаруй төгрөгийг улсын төсвөөс гаргасан. Үүнийг иргэд "Улсын төсвийг хий дэмий үрсэн" хэмээн шүүмжилж байсан. Тиймээс Ерөнхий сайдтай хамт явсан иргэд  14 сая гаруй төгрөгийг өнөөдөр Засгийн газрын Нөөц хөрөнгийн санд буцаан шилжүүлжээ.

Аврах ажиллагаанд Тагнуулын Ерөнхий газар, Хууль зүйн яам, Онцгой байдлын ерөнхий газар, Эрүүл мэндийн яамнаас нийт 13 машин, 130 хүн ажилласан бөгөөд нисдэг тэрэгний зардлыг оролцуулан нийт 14 сая 445 мянган төгрөг зарцуулсан гэх мэдээллийг Улсын онцгой комиссоос өгсөн юм. Үүний дагуу Бурхан Халдунд цасанд боогдсон 71 хүнээс Төрийн тусгай хамгаалалт, Онцгой байдлын албан хаагчдыг хасаад 58 хүн дээрх зардлыг хувааж төлжээ. Ингэхээр нэг хүнээс 250 мянган төгрөг цуглуулж, нийт 14 сая 445 мянган төгрөгийг өнөөдөр Засгийн газрын Нөөц хөрөнгийн санд шилжүүлсэн байна.