Сүүлийн үед хэвлэл мэдээллийн хэрэгслээр Ерөнхий сайд Н.Алтанхуяг дүүгийнхээ компанид Тавантолгойн нүүрс тээвэрлэх, ачиж буулгах эрхийг авч өгсөн гэж их шуугисан. Энэ талаараа Ерөнхий сайд Н.Алтанхуяг тодорхой тайлбар хийхгүй байгаа. Уг асуудлыг сөхөж тавьсан Ж.Энхбаяр гишүүний асуултад бараг л насанд хүрсэн хүмүүсийн хаана юу хийж явааг би мэдэхгүй гэсэн утгатай бүрхэг тайлбар хийсэн. Харин Тавантолгойн нүүрсийг зөөх эрх авсан компанийн захирлын нөхөр нь гэгдэх ЗГХЭГ-ын дэд дарга Г.Дэнзэн асуудалд бас л бүрхэг тайлбар хийлээ. Тэрээр би Тавантолгойн ТУЗ-д байдаг. ТУЗ-ийн гишүүнийг элдэв тендерт оролцох эрхийг хуулиар хаасан байдаг. Би хууль бус юм хийгээгүй л гэж. Гэхдээ манай эхнэрийн болоод ах дүүсийн компанийн Тавантолгойн нүүрсийг зөөх эрх аваагүй гэж тодорхой хариулж чадахгүй байна. Ингээд тодорхой хариулж чадахгүй болохоор л ард түмэн хардах эрхээ эдэлж байгаа юм.

Тэрээр өөр нэгэн маш ноцтой зүйлийг ярьсан. Тухайлбал “Миний хувьд Засгийн газрын Хэрэг эрхлэх газрын Хяналт шалгалт, дотоод аудитын газрыг хариуцан ажилладаг. Ажил авснаас хойш 300 ортой төрөх эмнэлгийн асуудал, Эрүүл мэндийн яамны Төрийн нарийн бичгийн даргын асуудал, Иргэний нисэхийн ерөнхий газар, Татвар, Гааль, Ашигт малтмалын газруудад хийсэн хяналт шалгалтыг Засгийн газрын Хэрэг эрхлэх газар хариуцан хийсэн. Зохих хэргүүд нь илрээд, холбогдох хүмүүс нь хариуцлагаа хүлээсэн байгаа. Миний хувьд эдгээр шалгалттай холбогдуулан Засгийн газрын Хэрэг эрхлэх газар руу чиглэсэн зохион байгуулалттай гүтгэлэг гэж хүлээж авч байна” хэмээн ярьжээ. Энэхүү яриан дээр дүгнэлт хийж үзвэл тэрээр сүүлийн үед дуулиан болоод байгаа авлигалын бүх хэргүүдийг хянаад, шалгаад гаргаад ирсэн юм биш үү? Цагдаа, тагнуул, АТГ-ынхныг ажилгүй болгож. Тэд энэ хэргүүдийг илрүүлээгүй ЗГХЭГ-ын дэд дарга Г.Дэнзэн илрүүлсэн юм байна. Тэгээд тэр хэрэгт орооцолдсон авлигачид түүний нэр төрд халдахын тулд эхнэрийнх нь компанийг Тавантолгойн нүүрсийг тээвэрлэх эрх авсан гэж зарлаж л дээ.

Засгийн газар хэзээ ийм дотоод аудитын газартай ч байсан юм бэ? Бодвол энэ залуу олон авлигачдыг мэдэж байсан. Тэгээд тэднийгээ барихын тулд ийм газар байгуулаад өөрөө удирдаад бариад хийчихсэн юм байна. Бодлого боловсруулах ёстой Засгийн газрын гал голомт болсон цөм нь авлигалын хойноос хөөцөлдөөд, энэ асуудлыг хариуцсан бүхэл бүтэн нэг биш нилээд хэдэн газрын өмнөөс ажлыг нь хийж өгдөг тухай хачин жигтэй юм яриад сууж байгаа хүн дарга хийдэг гэж бодохоор төрийг үнэлэх, Н.Алтанхуягийг хүндэтгэх ойлголт байхгүй болчих юм.

Эсвэл Н.Алтанхуяг АТГ, цагдаа тагнуулдаа итгэхгүй хүргэн дүүгээрээ авлигалын асуудлыг хөөцөлдүүлдэг болчихсон ч байж мэдэх юм. Хүргэн дүү нь ингэж тайлж уншихаар л юм яриад явна даа.