АОХН-ийн сайд нарын долдугаар чуулга уулзалтын хүндтэй зочдын нэг бол Тайландын Ерөнхий сайд, хатагтай Йинлак Чинават байсан. Түүнийг Ерөнхий сайд Н.Алтанхуяг, Ерөнхийлөгч Ц.Элбэгдорж болон төрийн томчууд хүлээн авч уулзсан билээ. Тэгвэл хатагтай Йинлак Чинаватыг уучлал гуйх ёстой хэмээн Тайландын сенатууд шүүмжилж, зарим сэтгүүлчид үндэстнээ гутаасан хэмээн доромжилжээ.

Тайландын 58 сенатч Ерөнхий сайдыгаа Монголд маргаантай илтгэл тавьсан тул ард түмнээс уучлал гуйх ёстой хэмээн шаардсан байна. Тэд хатагтай Йинлак Чинаватыг гадаад хэрэг, шашин, ёс зүй, хүний эрх, эрх чөлөө, үйлчлүүлэгчийн аюулгүй байдал, авлигалыг илрүүлэх, засгийг амжилттай төвхнүүлэх гэсэн ойлголтуудыг Сенатчдын зөвлөлд тайлбарлахыг шаарджээ.

Түүний Монголд тавьсан илтгэл нийгмийг төөрөгдүүлж, хагарал үүсгэсэн хэмээн үзсэн шалтгаанаа ингэж тайлбарласан аж. Тайландын Ерөнхий сайд АОХН-ийн хуралд илтгэл тавихдаа “Ардчиллын эсрэг байгууллын элементүүд одоо ч Тайландад байсаар байгаа” хэмээн хэлжээ. Мөн 2006 онд Тайландад гарсан төрийн эргэлт ардчиллыг замаас нь гаргаж, тухайн үед Ерөнхий сайдаар ажиллаж байсан ах Таксиных нь Засгийн газрыг унагаасан гэж. Хатагтай Йинлак Чинават 2007 оны үндсэн хууль нь цэргийн хүчнийхний удирдлага дор явагдсан гэжээ. “2006 оны төрийн эргэлтийн дараагаас шинэчлэж эхэлсэн шинэ үндсэн хуулийг цэргийн хүчнийхэн удирдсан нь олон нийтийн эрх, эрх чөлөөг хязгаарласан” хэмээн хэлжээ.

Сенатууд түүний илтгэлийг “тун зохисгүй” хэмээн тодорхойлжээ. Мөн түүний хэлсэн үгсийг улс төрийн өнцгөөс харвал хуулиудыг шинэчлэх, засварлах ёстой гэсэн санааг илэрхийлсэн, бүр цаашилбал ах Таксиныг цагаатгах санааг агуулсан гэжээ. Таксин нь төрийн газрыг зарах гэж байсан нь нотлогдож хоёр жилийн хорих ял авч шоронд суусан юм.

Мөн сенатууд өчигдөр манай улсын Ерөнхийлөгч Ц.Элбэгдоржид захидал явуулсан гэв. Тэрхүү захидалд Ерөнхийлөгчийг Йинлак Чинаватын тавьсан илтгэлийн талаар байр сууриа илэрхийлэхийг хүсчээ. Мөн захидалд Йинлак Чинаватын ах яагаад засгийн эрхээс арчигдсан, түүний засгийн үед ямар аюул гарч ирсэн талаар бичсэн аж.

Тайландад Ерөнхий сайдыгаа улс төрчид нь хатуухан шүүмжлэх үед сэтгүүлчид ч мөн дутсангүй. Түүнийг Монголын улс төрчидтэй аальгүйтсэн, улс орныхоо нэрийг гутаасан гэж хурц шүүмжилсэн юм. Сонины шог зураач “Биеэ үнэлэгчид нь муу ёрын хүмүүс биш. Тэд зөвхөн биеэ худалддаг. Харин муу ёрын эмэгтэй үндэстнээ худалддаг ” хэмээн бичсэн байна. Сониныг эсэргүүцэж Тайландад 100 гаруй хүн Йинлак Чинаватыг өмөөрөн жагсчээ.

Хатагтай Йинлак Чинават  нь Монголд Төрийн ордны зөвхөн эрэгтэйчүүд хөл тавьж болох, эмэгтэйчүүд шагайх ч эрхгүй өргөөнд орсон хэмээн шуугиан тариад амжсан билээ.