Авлига, хээл хахуулийн хэргээр гурван шатны шүүхээс 2.6 жилийн ял сонссон МАХН-ын дарга Н.Энхбаярыг ялаас чөлөөлөх эсэх тухай асуудлаар Эрүүл мэндийн яамнаас өчигдөр хэвлэлийнхэнд мэдээлэл өгсөн. МАХН- ын дарга Н.Энхбаяр ялаас чөлөөлөгдөх хүсэлтээ өнгөрсөн дөрөвдүгээр сарын 26-нд Засгийн газар, Эрүүл мэндийн яам, Улсын ерөнхий прокурорын газар гээд холбогдох бүхий л байгууллагад хүргүүлсэн билээ. Гэвч Н.Энхбаярын хүсэлтийг хүлээн авах боломжгүй гэсэн байна. Тиймээс Эрүүл мэндийн яамны заавраар Н.Энхбаярыг эрүүл мэндийн шалтгаанаар ялаас чөлөөлөхөд шаардлагатай бүх шинжилгээг авч, нарийн мэргэжлийн эмч нарын дүгнэлт гаргуулж байгаа аж. Энэ тухай Эрүүл мэндийн сайд В.Удвал “Н.Энхбаяр даргыг яг одоо ШШГЕГ-ын харьяа 401 дүгээр ангийн нэгдсэн эмнэлэг болон Улсын нэгдүгээр эмнэлгийн бөөр, мэдрэлийн тасгийн эмч нар үзэж, оношилж байна. Ял эдпэх боломжтой эсэхийг шийдэх эмч нарын дүгнэлт удахгүй гарна. Хэрэв ялаас чөлөөлөх үндэслэлтэй гэсэн эмч нарын дүгнэлт гарвал уг дүгнэлтийг УЕПГ-т хүргүүлж, энэ асуудлыг шүүхээр шийдвэрлүүлэх ёстой’’ гэв. Хэрэв ШШГЕГ-ын харьяа 401 дүгээр ангийн нэгдсэн эмнэлэг болон Улсын нэгдүгээр эмнэлгийн эмч нар Н.Энхбаярыг эрүүл мэндийн шалтгаанаар ял эдлэх боломжгүй гэж үзвэл прокурорын байгууллагаас эмч нарыг зөв оношилсон эсэхийг шалгаж үзэх нь лавтай. Цагдаагийн экс удирдлагууд болох Ш.Батсүх, О.Зоригт болон Говьсүмбэрийн Засагдарга асан Ж.Баянмөнх нарыгял эдлэх боломжгүй гэсэн дүгнэлтийг ШШГЕГ-ын харьяа хорих ангийн эмч нар гаргасан байдаг. Уг хүсэлтийн дагуу Прокурорын байгууллагаас тусгай шинжээчид томилон дахин дүгнэлт гаргуулахад эмч нар хүмүүжигчдийн өвчнийг буруу оношилсныг нь нотолсон. Буруу онош гаргасан эмч нарт эрүүгийн хэрэг үүсгэн шалгаж эхэлсэн билээ. Үүнтэй мөн адил Н.Энхбаярыг оношилсон эмч нарын дүгнэлтийг прокурорын байгууллагын шинжээч, эмч нар сайтар нягтлах нь тодорхой юм.