АНУ-ын Массачусетс, Коннектикут, Нью-Жерси гэсэн гурван муж улсын эрх баригчид Бостонд алан хядах ажиллагаа зохион байгуулсан гэгдээд байгаа талийгаач 26 настай Тамерлан Царнаевын шарилыг оршуулах газар өгөхөөс татгалзжээ.
Тамерлан Массачусетс муж улсын Кэмбриж хотод аж төрж байсан аж. Эндхийн оршин суугчид цуглаан зохион байгуулж, шарилыг АНУ-аас гаргахыг шаардсан байна. Шарилыг авахаар ирсэн Тамерланы төрөл садангийн Руслан Царни үүнтэй холбогдуулан “дүү маань Америкт амьдарч байсан, түүний эх орон нь Америк байсан учраас эндхийн хөрсөнд шингэх учиртай” гэж мэдэгдсэн аж. Энэ бүхний хажуугаар Холбооны мөрдөх товчоо (ХМТ) Тамерлан Царнаевын гэрт дахин нэгжлэг хийх гэнэ. Бостонд дэлбэрсэн бөмбөгийг Тамерлан Царнаевын гэрт бэлтгэснийг ХМТ-ны ажилтнууд өмнө нь тогтоосон юм. Нөхрөө алан хядах ажиллагаанд бэлтгэж байгааг мэдээгүй гэж талийгаачийн бэлэвсэн гэргий Кэтрин Рассел мэдэгджээ.