АНУ-ын Жоржия мужийн иргэн дэлхийн хамгийн алдартай ундаа Кока Колагийн жорыг олсон хэмээн мэдээлсэн нь олны анхаарлыг татаж байна. Тэрээр энэхүү нууц баримтыг “eBay” сайтад таван сая ам.доллараар худалдах зар тавьжээ.

Нисэгч мэргэжилтэй Клифф Клуге эхнэрийнхээ хамт олон хайрцаг бүхий хуучин цаас, захидлын хаягдлыг 100 долларт худалдан авчээ. Хосууд дэлхийн хамгийн алдарт ундааны 1943 оны жорыг хаягдлын дундаас гарч ирнэ гэж зүүдлээгүй явсан гэв.

Жижиг бизнес эрхлэгч эхнэр Арлен Клуге “Би жорыг олоод хамгийн түрүүнд сонирхолтой юм аа  л гэж бодсон. Тэгээд цүнхэндээ хадгалаад найз нөхөддөө үзүүлсэн” хэмээн ярьжээ.

Тэдний гэр бүл “ABC” телевизийнхэнд баримтыг хуулбарыг үзүүлсэн юм. Баримт олдсон захидал магадгүй Кока Кола компанид ажилладаг байсан хэн нэгнийх байж болох юм хэмээн таамаглаж байна.