Америкийн нэгдсэн улсад дуудлага худалдаагаар зарах гэж байсан үлэг гүрвэлийн яс нь Өмнөговь аймгийн "Гурван тэс" сумын нутаг дэвсгэр, “Нэмэхтийн хөндий” гэх газраас олддог "Тарбозавр батаар” хэмээх төрлийн үлэг гүрвэлийн яс болох нь шинжилгээгээр нотлогдсон гэсэн мэдээллийг ЦЕГ-т хянаж шалгажээ. Ингээд уг үлэг гүрвэлийн ясыг хууль бусаар Монгол Улсын хилээр нэвтрүүлсэн гэдэг нь тогтоогджээ. Энэхүү хэрэгт Монгол Улсын Эрүүгийн хуулийн тусгай ангийн 175 дугаар зүйлийн 175/3 дахь хэсэгт зааснаар УМБГ-т эрүүгийн хэрэг үүсгэн шалгаж эхэлжээ. Хэрэгт Монгол Улсын иргэн Ө, Ө, Б, Э, Д, Г, О, И нарын 8 хүнийг холбогдуулж шалгаж байгаа юм байна.   Сэжигтэн нар нь үлэг гүрвэлийн ясыг хууль бусаар малтаж, бусдад нийлүүлдэг байсан ба 1999-2001 онуудад палентологийн хайгуулыг хууль бусаар хийх, олдворуудыг худалдсан тохиолдолд орлогыг хувааж авах талаар хууль бус гэрээ байгуулсан болохыг мөрдөн байцаалтаар тогтоожээ. Мөн энэ хэрэгт АНУ-ын иргэн Эрик Прокопи /Ргокор| Епс/, Япон улсад оршин суух АНУ- ын иргэн Холлис Баттс /НоШз Вийз/, Их Британ Умард Ирландын Нэгдсэн Вант Улсын иргэн Крисс Мүүри /СЬпз Мооге/ нар нь холбоотой болохыг тогтоосон байна.

Хэргийн холбогдогч нар нь Монгол улсад удаа дараа ирж байсан нь Хил Хамгаалах Ерөнхий Газрын лавлагаа, сэжигтэн этгээдүүдийн гэрт хийсэн нэгжлэгийн явцад илэрсэн бөгөөд барих болохуйц зүйлсийг хураан авсан байна. Шалгалтын явцад Т, Ө, О нарын хамт үлэг гүрвэлийн олдворт газруудаар явсан, хууль бусаар малтлага хийсэн зэрэг гэрэл зургууд, захидал, худалдах үлэг гүрвэлийн ясыг хэрхэн тээвэрлэх замын маршрутыг дурьдсан гадаадын иргэдтэй харилцсан цахим шуудан, СД дээр хуулбарласан үлэг гүрвэлийн цэвэрлэгээ хийгээгүй чулуужсан яс, хэлхээ ясны зураг зэрэг нотлох баримтууд гарч иржээ. Тиймээс дээрх этгээдүүд нь Монгол улсын Түүх, соёлын үнэт өв болох палентологийн олдворуудыг хууль бусаар малтан улмаар улсын хилээр хууль бусаар нэвтрүүлж гадаад улсын иргэдэд худалдаалж байсан нь тогтоогдоод байгаа аж.

Монгол Улсын хилээр хууль бусаар соёлын өв дурсгал, үнэт олдворын зүйл удаа дараа /овор их хэмжээ ихтэй/ гарсан байхад хуулийн дагуу хяналт тавьж ажиллах ёстой тэр үеийн БСШУЯ, ГЕГ, ХХЕГ-ын удирдлага, холбогдох албан тушаалтнууд албан тушаалдаа хайнга хандсан байх тул Эрүүгийн хуульд заасны дагуу мөрдөн шалгахаар болсон байна.