Мяньмарын Ерөнхийлөгч Тейн Сейн өчигдөр АНУ-д айлчилж, Ерөнхийлөгч Барак Обаматай уулзлаа. Энэ нь Зүүн Өмнөд Азийн үндэстний тэргүүн тус улсад сүүлийн 47 жилд анх удаа зочилж буй ховорхон хэрэг болсон юм.

Төрийн тэргүүдийн уулзалтын үеэр Барак Обама Мяньмарыг үндэстний цөөнх буюу исламын шашинт рохингьячуудыг гадуурхаж, хүчирхийлэхгүй байхыг уриалжээ.

Мяньмарын иргэн байх эрхгүй рохингьячууд болон тус улс дахь буддистуудын хоорондох тэмцэлд өнгөрсөн жил л гэхэд 192 хүн амиа алдсан юм. Мөн 140 мянга гаруй рохингья өнгөрсөн жилийн мөргөлдөөнөөр орон гэргүй болсон аж.

Харин Мяньмарын Ерөнхийлөгч Тейн Сейн огцом реформ хийж буй улсыг нь ойлгож, туслахыг АНУ-аас хүсчээ.