Сүүлийн өдрүүдэд хэл ам дагуулсан томилгооны асуудал дуулиан тарьж байна. Ерөнхий сайд Н.Алтанхуяг Тагнуулын Ерөнхий газрын даргаар Б.Ариунсан гэх болж бүтэхгүй нөхрийг томилсныхоо төлөө сөрөг хүчний зүгээс огцрох ёстой гэсэн шүүмжлэлийг дахин хүртээд байгаа.

Мөн хүн амины хэрэгт холбогдож байсан гэгддэг Н.Лүндэндоржийг хэдхэн хоногийн өмнө шүүхийн ерөнхий зөвлөлийн даргаар томилсон нь бас л хэл ам дагуулаад байгаа билээ. Асуудал намжаагүй байтал шудрага бусаар шүүхийн ерөнхий зөвлөлийн дарга болсон гэгддэг Н.Лүндэндоржийн эрх мэдэл, хангамжийг нэмж УИХ, Засгийн газрын гишүүнийхтэй адил болгов. Тодруулбал Төрийн байгуулалтын байнгын хорооны өчигдрийн хуралдаанаар Н.Лүндэндоржийг УИХ, Засгийн газрын гишүүний адил хангамжтай болгохыг дэмжсэн юм.

Хүний аминд хүрчихээд үйлдсэн хэргийнхээ хариуцлагыг хүлээж, шүүгдэгчийн ширээний ард суугаагүй, ял сонсоогүй, хэргээ хүлээгээгүй “Хүн амины хэрэгтэн” Шүүхийн Ерөнхий зөвлөлийн даргаар томилогдож бүр цаашлаад Засгийн газар, УИХ-ын гишүүний адил улсаас хангамж хүртэж байгаа нь шудрага бус гэж үзэх хүмүүс ч байна.

Н.Лүндэндорж нь МУИС-ийн Хууль зүйн сургуулийн дэд захирлаар ажиллаж байх үедээ согтуугаар машин жолоодож "Аварга" дээд сургуулийн оюутныг  дайран амь насыг нь хохироосон ч нэр хүнд, танил талаараа ял авалгүй мултарч үлдсэн нэгэн гэдэг. Гэвч Хууль зүйн сургуулийн захирал С.Нарангэрэл түүнийг багш байх ёсгүй гэж үзэн ажлаас нь чөлөөлсөн байдаг. Улмаар өөрийн шавь С.Тэмүүжинг Хууль зүйн сайд болсоны дараа Хууль зүйн үндэсний хүрээлэнгийн захирлаар томилогдсон. Мөн Шүүхийн ерөнхий захирлаар ч томилогдон сайдын хэмжээний эрх, ямба эдлэх гэж байна. Хуучин Хууль зүйн сайд эсвэл ерөнхий шүүгч нь шүүхийн ерөнхий зөвлөлийг даргалаад элдэв цалин хангамжгүй яваад ирсэн. Шүүхийн Гэтэл одоо нэг албан тушаалын томилгооны дараа УИХ-ын тогтоолд өөрчлөлт оруулж, улсын их хурлын тогтоолоор шийдэх гэж зүтгэж байна.

 Ямартай ч шүүхийн ерөнхий зөвлөлийн гишүүдийн эрх мэдэл, хангамжийг нэмэгдүүлснээр Засгийн газрын 19 сайд дээр дахин таван хүний унаа хангамж, өрөө тасалгааны хөрөнгө мөнгийг нэмээд зарлагадчихаж байна. Нэг томилгоо хийгээд л хангамж ярьдаг асуудлыг хэзээ зогсоох вэ?