АНУ-ын Бостон хотын захад хоёр жилийн өмнө гурван эрэгтэйн хоолойг хэрчиж хөнөөгөөд, цогцос дээр нь хар тамхи асгасан хэрэг олныг сэрдхийлгэж байв. Одоог хүртэл шийдэгдээгүй энэ хэргийн сэжигтэнг хайсаар Холбооны мөрдөх товчооныхон Флорида мужийн Орландо хотод ирсэн байна. Тэд 27 настай, чечень гаралтай Ибрагим Тодашевийг энэ хэрэгт буруутай хэмээн үзэж баривчлахаар очжээ.

Харин Ибрагим Тодашев өнгөрсөн сард болсон Бостон хотын халдлагын сэжигтэн 26 настай Тамерлан Царнаевтай хамт гурван залуугийн хоолойг хэрчсэн хэмээн мэдүүлжээ. Ибрагим Тодашев “Бид хоёр тэр үед хар тамхины дээрэм хийж байсан. Гурван залуу бидний царайг харсан, биднийг мэдэж байсан учраас алахаас өөр арга байгаагүй” хэмээжээ.

2011 онд хоолойгоо хэрчүүлсэн гурван залуу Тамерлан Царнаевын сайн найзууд байсан аж.

Ибрагим Тодашев өчигдөр Орландо хот дахь гэрийнхээ гал тогооны өрөөнд залуусыг яагаад хөнөөсөн, Тамерлан Царнаевыг яаж мэддэг болсон зэрэг асуултад хариулах үедээ Холбооны мөрдөх товчооны ажилтан луу хутга барин дайрсан байна. Иймээс ажилтан биеэ хамгаалж түүнийг буудан хөнөөжээ.

Холбооны мөрдөх товчооны мэдээлснээр Ибрагим Тодашев нь олон жилийн өмнө Чечениэс цагаачлан иржээ. Тэрээр ОХУ-д ах, дүү Царнаев нартай нэг дүүрэгт амьдардаг байсан аж. Мөн тэд зодооны урлагийг сайн эзэмшсэн байсан гэв. Холбооны мөрдөх товчоо сэжигтнүүдийн ДНК-г шинжлүүлэхээр өгсөн байна. Ибрагим Тодашев нь аль хэдийн ногоон карт авсан бөгөөд Чеченьлүү эцэг эх дээрээ очоод буцаж ирэхээр төлөвлөж тийз захиалсан байжээ.

Өнгөрсөн сарын 15-нд болсон марафон гүйлтийн тэмцээний үеэрх халдлагад гурван хүн амиа алдаж, 264 хүн бэртэж гэмтсэн юм. Энэхүү хэрэгт Тамерлан Царнаевын дүү 19 настай Жохар Царнаевыг буруутган байцааж байна.