САРС-тай адил шинэ төрлийн үхлийн аюултай вирусын халдвар авсан хүний тоо 49-д хүрсэн тухай Дэлхийн эрүүл мэндийн байгууллага мэдээллээ. MERS-CoV буюу коронавирусын төрлөөр халдварладаг энэ өвчин туссан хүмүүсийн олонхи нь Зүүн Азийн орны иргэд бөгөөд тэдний 29 нь нас бараад байна. Хамгийн сүүлийн тохиолдол нь Саудын Арабт бүртгэгджээ.

   Саудын Арабын Эрүүл мэндийн сайдын өчигдөр мэдээлснээр нэг мужид энэ шинэ төрлийн вирусын улмаас гурван хүн нас барсан аж. Мөн тус улсад аялж явсан Францын иргэн өвчилж, улмаар нас барсан гэж Дэлхийн эрүүл мэндийн байгууллага мэдээлжээ.

    Халдвар хэдийгээр Зүүн Азид гараад байгаа ч жуулчдыг дагаж Европын орнуудад тархах магадлал асар өндөр байгаа юм. НҮБ-ын 66 дахь Ерөнхий ассемблейн уулзалт дээр Маргарет Чан "Энэ асуудал Европт шууд биш гэхэд дам нөлөөлөх нь гарцаагүй. Ялангуяа Франц, Английн хувьд Зүүн Азийн жуулчид ихээр ирдэг" гэжээ.

   Энэ шинэ төрлийн вирус нь САРС-тай төстэй хүний амьсгалын замд нөлөөлдөг. Гэхдээ САРС биш. Харин ханиалгах, халуурах зэрэг шинж тэмдэг илрэх бөгөөд цаашлаад уушиг, бөөрний үйл ажиллагаанд нөлөөлдөг. Эрдэмтэд шинэ вирусын талаар судалж, хэрхэн тархалтыг нь зогсоох талаар ажиллаж байна.