Бостоны дэлбэрэлтэд сэжиглэгдэн байцаагдах үеэрээ байцаагч руу дайрч амиа алдсан гэх Ибарагим Тодашевын эцэг Абдулбаки Тодашев өчигдөр мэдээлэл хийлээ. Тэрээр хүүг нь бие хамгаалах зорилгоор биш санаатай хөнөөсөн гэдгийг батлахыг хүссэн байна.

27 настай, чечень гаралтай Ибрагим Тодашевыг өнгөрсөн долоо хоногт Флорида мужийн Орланда хот дахь гэрт нь баривчилж, байцаасан юм. Түүнийг 2011 онд болсон гурван эрэгтэйн хоолойг хэрчиж хөнөөсөн хэрэгт болон Бостон хотын марафон гүйлтийн үеэр гарсан халдлагад сэжиглэн байцаасан юм. Түүнийг гал тогооны өрөөнд байцаагдах үедээ Холбооны мөрдөх товчооны ажилтан Тамерлан Царнаевтай ямар холбоотойг асуух үед хутга барин дайрсан тус амиа хамгаалж буудан хөнөөсөн хэмээн мэдээлж байсан.

Харин эцэг Тодашев хүүгийнхээ цогцсын зургийг сэтгүүлчдэд үзүүлэн санаатай аллага байсан хэмээн ярьсан байна.

“Хүүг маань найман цагийн турш байцаасан. Тэгээд дараа нь зургаан удаа биенд нь, нэг удаа толгойд нь буудсан. Миний хүүгийн толгойд буудсан сумны шарх түүнийг биеэ хамгаалах гэж биш санаатайгаар буу тулгаж байгаад хөнөөснийг гэрчилнэ” хэмээн Абдулбаки Тодашев ярьжээ. Мөн тэрээр “тэд түүнийг шархдуулж болох л байсан, харин энэ бол санаатай аллага” хэмээн хэлжээ.

Эцэг Тодашев хүү Ибрагим Тодашевын найз Царнаевынхны хөвгүүдийг халдлага үйлдэж 200 гаруй хүнийг шархдуулсан гэдгийг хүлээн зөвшөөрөхгүй байгаа хэмээжээ. Тэрээр “Тэд миний хүүг хөнөөсөн гэмт хэрэгтнүүд болохоос Холбооны мөрдөх товчооны албан хаагчид биш” хэмээн хэлсэн байна.

Ибрагим Тодашевыг Бостоны халдлагад сэжиглэгдэн баривчлагдах үедээ цагдаа нартай мөргөлдөж амиа алдсан Тамерлан Царнаевтай хамт хоёр жилийн өмнө гурван залууг хөнөөсөн гэдгээ хүлээн зөвшөөрсөн хэмээн Холбооны мөрдөх товчооныхон мэдээлж байсан.

Холбооны мөрдөх товчооны мэдээлснээр Ибрагим Тодашев нь олон жилийн өмнө Чечениэс цагаачлан иржээ. Тэрээр ОХУ-д ах, дүү Царнаев нартай нэг дүүрэгт амьдардаг байсан аж. Мөн тэд зодооны урлагийг сайн эзэмшсэн байсан гэв.

Өнгөрсөн сарын 15-нд болсон марафон гүйлтийн тэмцээний үеэрх халдлагад гурван хүн амиа алдаж, 264 хүн бэртэж гэмтсэн юм. Энэхүү хэрэгт Тамерлан Царнаевын дүү 19 настай Жохар Царнаевыг буруутган байцааж байна.