Өчигдөр гэнэтхэн л ЗГХЭГ-ын дэд дарга Г.Дэнзэн хэвлэлийн бага хурал зарлав. Яаран сандран хэвлэлийн бага хурал зарласны учиг орой нь тайлагдлаа. Түүний талаар Ерөнхийлөгч байр сууриа илэрхийлж хэвлэлд ярилцлага өгсөн байна. Үүнийг нь сонссон залуухан дарга Г.Дэнзэн Ерөнхийлөгчийн яриа орой телевизээр гарахаас өмнө өрсөж байр сууриа илэрхийлэхээр яаран сандран зүтгэсэн нь ийм учиртай байжээ. Бас их эрээ улсын Ерөнхийлөгчтэй хүртэл барьцаж уралдаж тайлбар хийгээд л. Улсын Ерөнхий сайдыг хүртэл үеийн юм шиг нэрээр нь дуудаад л. Тэрээр “Би долоон жилийн өмнөөс Н.Алтанхуягтай хамтарч ажиллаж байсан. Би түүнийг Ерөнхий сайд болчихно гэж бодоогүй. Өнгөрсөн жил Англи сурдаг нэг охинтой танилцаад үерхсэн. Сүүлд нь харин Н.Алтанхуягийн хамаатан гэдгийг нь мэдсэн. Н.Алтанхуягийн хамаатан гээд хайртай хүнээсээ сална гэж юу байхав. Би чинь хайрлаж, дурлах эрхтэй юм байгаа биз дээ. Гэхдээ одоогоор албан ёсоор батлуулсан юм байхгүй. Хамтран амьдарч байна” хэмээн байр сууриа илэрхийлжээ.

Улсын Ерөнхий сайдыг Н.Алтанхуяг гэж цоллоод л. Н.Алтанхуягтай хамтарч ажиллаж байсан гээд л. Н.Алтанхуягийн хамаатан гэдэгийг мэдээгүй гээд л. Н.Алтанхуяг сайдтай яг л үеийн юм шиг ярьж байгаа биз. Энэ түүхий ярианаас нь л түүнийг хэн бэ гэдэгийг нь дүгнэж болно. Улсын Ерөнхий сайдыг, хүргэн ахыгаа ингэж хүндэтгэлгүй хандана гэдэг энэ хүний мэдлэг боловсрол хийгээд харилцааны соёлыг илтгэх шиг. Ядаж Ерөнхий сайдын маань хамаатан байсан байна лээ. Би Ерөнхий сайдтайгаа олон жил хамтран ажиллаж ирлээ. Манай дарга гээд улс төрийн хэллэгээр тайлбарлаж болно доо. АН-ын боловсон хүчинүүд иймэрхүү л харилцаа, хандлагатай гэж ард түмэн хэлээд байдгийн нэг илрэл нь Г.Дэнзэн болов гэсэн шүүмжлэл өрнөж байна.

Гэхдээ Г.Дэнзэн зориуд тэгж хэлсэн байх үндэслэл ч бий. Учир нь тэрээр Н.Алтанхуягаас л болж албан тушаалгүй болохоос гадна нэр хүндгүй болж байх шиг байна. Тиймээс үүнд дургүйцэж зориуд Н.Алтанхуяг гэж цоллосон байхыг үгүйсгэхгүй. Тэгвэл бас л зоригтой улс төрч болж мэдэх шийр гэдэг нь харагдана.
17 тэрбумын тендерээс болж бүх залуучуудын анхаарлыг татсан Г.Дэнзэн даргын талаар Монгол Улсын Ерөнхийлөгч Ц.Элбэгдорж телевизэд ярилцлага өгөхдөө “Би Ерөнхий сайдад хэлсэн. Ер нь энэ Г.Дэнзэн гэдэг хүнээ ажлаас нь өөрчил. Шалгуул гэж хэлсэн” хэмээн тайлбар хийсэн юм. Улсын Ерөнхийлөгч ийм үүрэг даалгавар өгөөд байхад Ерөнхий сайд ямар арга хэмжээ авахыг ирэх өдрүүд харуулна.

Ингэхэд улсын Ерөнхийлөгчийн чихийг хүртэл халууцуулсан Г.Дэнзэн гэж хэн бэ? Тэрээр ЗГХЭГ-ын дэд дарга. “Эрдэнэс МГЛ” хувьцаат компанийн ТУЗ-ын гишүүн,  Эрдэнэс Тавантолгой компанийн ТУЗ-ын дарга, Төрийн банкны ТУЗ-ын гишүүн, ШУТИС-ийн удирдах зөвлөлийн гишүүнээр ажилладаг. Өмнө тэргүүн шадар сайд Н.Алтанхуягийн туслах, зөвлөхөөр ажилласан гэсэн товчхон намтартай аж. Түүний эхнэрийн өөрийнх нь тайлбарласнаар бол хамтран амьдрагч Г.Уянгын “Gowi Power” ХХK 17 тэрбумын тендерт ялсан гэж сөрөг хүчин нотлоод байгаа. Харин тэрээр энэ талаар “Тийм зүйл огт байхгүй гэдгийг албан ёсоор хэлье. Тавантолгойгоос 17 тэрбумын тендер авсан юм юу ч байхгүй. “Gowi power” гэдэг компани байхгүй, хэзээ ч байгаагүй. Би болон манай эхнэрт ямар ч компани байхгүй” хэмээх тайлбар хийлээ. Эндээс нэг асуудал гарч ирж байна. Үнхээр тийм компани байхгүй нь үнэн үү? Үнэхээр ийм компани 17 тэрбумын тендерт ялсан гэдэг үнэн үү? Хэрэв ялсан бол нэгэн залуухан гэр бүлийн нэрийг зарим хүмүүс ашиглаад байгаан биш үү? Тэр хүмүүс хэн бэ? Тэрийг яагаад Г.Дэнзэн дарга хэлж чадахгүй байна вэ? Энэ асуудлыг харин шалгах ёстой юм биш үү? гэсэн шинэхэн асуудал гарч ирж байна.

Г.Дэнзэнгийн тайлбараар бол түүний нэрийг зарим эрх мэдэлтнүүд ашиглаад байгаа бололтой. Тэгээд хэлмэгдээд байгаа аж. Хэрэв тийм бол түүнийг муулах биш харин хамгаалах ёстой. Г.Дэнзэн дарга ч бас нэр төрөө сэргээлгэхээр хуулийн байгууллагад хандаж байгаа аж. Харин энэ үйл явдалтай зэрэгцэн Г.Дэнзэнгийн асуудлыг идэвхитэй сөхсөн УИХ-ын гишүүн Н.Номтойбаяр тайлбар хийлээ. Тэрээр “Г.Дэнзэн бол биднээс өөрцгvй залуу! Харин ард суучаад нэр, гараар нь хамаг муухайг хийлгэж байгаа ах Н.Алтанхуягтай хариуцлага тооцох” ёстойг онцолсон юм. Явж явж Г.Дэнзэнгийн нэрийг хадам ах Н.Алтанхуяг нь ашиглаж хайран сайхан залууг ажилгүй бас нэр төргүй болгох эхлэлийг тавьсан бололтой. Тиймээс л Г.Дэнзэн дарга Н.Алтанхуягтай,  Н.Алтанхуягийн гэх мэтээр ил тодоор дургүйцлээ илэрхийлсэн болоод явчихлаа даа. Соёлгүйдээ ч, мэдлэг боловсролгүй дээ ч ингэж хэлээгүй бололтой. Зориуд хэлэх гэж хэлсэн ч байж мэдэх юм. 17 тэрбумын утасны үзүүр өөр тийшээ хөвөрч эхэллээ.