Засгийн газрын хэрэгжүүлэгч агентлаг Иргэний нисэхийн ерөнхий газрын дэд дарга Б.Алтанцомыг ажлаас нь чөлөөлжээ. Түүнийг Зам тээврийн сайд Ч.Гансүхийн тушаалаар халсан бөгөөд шинэ дэд даргаар МИАТ-ийн Нислэгийн хэлтсийн дарга Ч.Нямсайханыг томилсон байна.

Ч.Нямсайханыг салбартаа 24 жилийн турш ажилласан туршлагатай нэгэн хэмээж байна. 46 настай тэрээр инженер-нисгэгч мэргэжилтэй, орос, англи хэлтэй аж.

Ажлын туршлагын хувьд ЗХУ, ОХУ-д нисгэгч, инженер-нисгэгч мэргэжил эзэмшжээ. 2002 онд АНУ-ын Сиэтл хотын “Боинг” компанийн төвд “Боинг-737” онгоцны нисгэгчийн мэргэшсэн сургалтад хамрагдсан байна. Мөн 1989 оноос МИАТ ХК-д АН-2 онгоцны нисгэгчээр ажлын гараагаа эхэлснээс хойш Ю-12 онгоцны нисгэгч, АН-24 онгоцны нисгэгч, Боинг-737 онгоцны нисгэгч, онгоцны дарга зэрэг албан тушаал хашжээ.