Пакистаны Исламын лиг-Наваз намын тэргүүн Наваз Шариф Пакистаны Ерөнхий сайдаар сонгогдлоо. Өчигдөр тус улсын Үндэсний ассемблейн хурлаар ийм шийдвэр гаргажээ.

Пакистаны парламентын доод танхим буюу Үндэсний ассемблейн мэдээлснээр Наваз Шариф 317 саналаас 244 санал авснаар ялалт байгуулсан гэлээ. Харин түүний гол хоёр өрсөлдөгч болох Пакистаны Ардын намын Махдүм Амин Фахим 42 санал, Техрик-и-Инсаф намын Жавед Хашими 31 санал авсан байна.

Наваз Шариф тун удахгүй тангараг өргөх юм. Ингэснээр тэрээр тус улсад гурав дахь удаагаа сонгогдсон анхны ерөнхий сайд боллоо. Түүний нам өнгөрсөн сарын ерөнхий сонгуульд ч мөн ялалт байгуулсан билээ. Наваз Шариф нь 1990-1997 оны хооронд ерөнхий сайдаар хоёр удаа сонгогдон ажилласан юм. Харин 1999 оны аравдугаар сард цэргийн Первез Мушарраф засгийн эрхийг авснаар түүнийг 2000 онд цөллөгт явуулжээ.