Өчигдөр орой 22.10 цагт “Korean air” компанийн нислэг Улаанбаатарт газардаж Интерполоор хайгдаж эхэлсэн Эрүүл мэндийн сайд асан Н.Хүрэлбаатар эх орондоо ирсэн юм.  Түүнийг ирсэн даруйд нь цагдаа нар Нийслэлийн цагдаагийн газрын харъяа Иргэний агаарын тээврийн цагдаагийн хэлтэс рүү албадан авч явж байцаажээ. Ингээд шөнийн 01.30 цагийн орчим  ШШГЕГ-ын харъяа хорих 461-р анги руу баривчлан авч явсан байна.  Нисэхийн цагдаагийн байрнаас гарч, машинд суух хүртэл Н.Хүрэлбаатараас хэвлэлийн мэдээллийн хэрэгслийнхэн олон асуултыг асуусан ч тэрээр гурван өгүүлбэр л хэлж амжсан байна. Тодруулбал,  “Үнэн мөнийг тогтооно гэдэгт эргэлзэхгүй байна. Хэлмэгдүүлчихгүй байх. Улс төрийн ямар нэгэн шалтгаантай” гэжээ.  Уг нь түүнд сэтгүүлчдийн асуултад тодорхой хариулах сонирхол байсан боловч цагдаагийнхан боломж олгоогүй гэдгийг өнөөдрийн хэвлэлүүдэд бичсээр байгаа юм.