Дараа нь нэр дэвшигч Ц.Элбэгдорж үг хэлэхдээ “Чингэлтэйчүүд ардчилал, сайн бүхнийг дэмжиж ирсэн. Та бүхэнд баярлаж явдаг шүү. Монголынхоо ард түмний дэмжлэгээр би УИХ-ын гишүүн, Ерөнхий сайд, Монгол Улсын Ерөнхийлөгч болж чадсан. Би бол та нарын өмч. Монгол орныхоо баруун, зүүн хязгаарт ажиллаж, иргэд сонгогчидтойгоо уулзаж, тэднийхээ санаа бодлыг сонсоод ирлээ. Монгол орон даяар бүтээн байгуулалтын их ажил өрнөж байна.

 

 

Иргэд маань тохилог сайхан орон сууц, цэцэрлэг, хүүхдийн тоглоомын газар, зам барьж байгуулж байна. Хамгийн сүүлд Өвөрхангайд гэхэд 24 багаа шинэчлэн барьж байгуулж байхтай таарлаа. Сүхбаатар аймгийн төв гэр хорооллынхоо гуравны хоёрыг тохилог орон сууц, хүүхдийн цэцэрлэг, тоглоомын талбайтай болгожээ. Манай нийслэлд ч их ажил өрнөж байна. Өмнө нь яагаад ингэж ажил өрнөөгүй юм бэ. Компаниудын олох гэж яваа 10 хувийн ашгийг авлигачид авчихдаг байж.

 

 

Одоо авлига нэхэхгүй байна. Тиймээс ажил хурдан, эрчтэй өрнөхийн зэрэгцээ монголчууд өөрсдөө барилгаа барьж, замаа тавьж байна. Та бүхэн нийслэлийн замууд, тэдгээрийн уулзварыг хэрхэн өөрчилж байгааг харж байгаа. Хоёрт Монгол Улсын нэр хүнд өндөр байна. Олон улсын зах зээлээс мөнгө  босгоход бидэнд итгэж байна. Биднийг авлигатай тэмцэж байгааг, бас сайн засаглалтай  болсныг дэлхий харж байна. Бид бүр илүү хурдтай хиймээр байна, хөгжмөөр байна.

 

 

Жилд таван сар л ажил хийх боломж байдаг. Сонгуульгүй хоёр жилд гэхэд нийлээд 10 сар ажиллана шүү дээ. Дээр нь бензинээ өөрсдөө хийдэг болчихвол улсын хөгжил өөр болно. Өчигдөр УИХ бензин үйлдвэрлэх технологи, тоног төхөөрөмжийг худалдан авахад татвараас чөлөөлөхөөр шийдвэр гаргасан байна. Өөрийн гэсэн галтай болох шийдвэр гаргасан гэсэн үг. Өөрийн бензин, шатахуунтай болсноор Монгол Улсын эдийн засаг, та бүхний амьдрал сайжрах болно. Одоо бидэнд хий улс төржилт хэрэггүй. Ерөнхийлөгчид намгүй нэг хүн дэвшиж байгааг та бүхэн мэдэж байгаа. Гэхдээ сэтгэлд минь ганц нам бий.

 

 

Тэр нь 2,9 сая гишүүнтэй Монгол Улс. Түүнийхээ төлөө л зүтгэнэ. Улс төржилт бидэнд саад болж байна. Тавдугаар цахилгаан станцыг барина гээд 12 жил улс төржлөө. Уг нь нүүрсний их нөөцөө ашиглаад цахилгаан станцууд бариад эхэлбэл мөдхөн Монгол хамгийн хямд цахилгаантай орон болно. Гэр хорооллын дахин төлөвлөлтөд цахилгаан, дулаан хэрэгтэй. Бид зөвхөн төмөр замаараа ч баяжиж болно. Манайхаар дайраад Европт ачаа бараа хүргэхэд галт тэрэг 14 хоног явна. Далайгаар бол нэг хоёр сар явна. Тиймээс төмөр замаа барьчихад бид одоогийнхоос олон дахин их ачаа тээвэрлэх боломж нээгдэнэ. Намайг Ерөнхий сайдаас хоёр удаа огцруулахад монголын ард түмэн түшиж авсан.

 

 

Тиймээс би өөрийгөө та бүхэнд, ард түмэндээ өртэй хүн гэж боддог. Бас ард түмний мөнгөнөөс хэн нэгэн хулгайлахыг үзэн яддаг. Авлигатай тэмцэж байгаа маань ч та бүхний төлөө хийж байгаа ажил. Намайг зарим нэг нь Ерөнхийлөгч болоод ард түмнээсээ тасраад явчихсан гэж боддог, бас ярьдаг байж магадгүй. Тэгвэл миний авлигатай тэмцэж буцаан авч байгаа мөнгө тэтгэвэр, хүүхдийн сургууль, цэцэрлэг болж танд очиж байгаа. Би ард иргэдээсээ тасраагүй, хамт байгаа. Нөгөөтэйгүүр бидэнд мөнгө тэгтлээ дутаагүй. Харин хариуцлага дутаж байна. Хариуцлага дутсанаас ядуу байна. Чингэлтэй дүүрэгт гурван газар гэр хорооллын дахин төлөвлөлт хийх гэж байгаа гэж Д.Баттулга дарга надад хэлсэн. Ингэснээр та бүхний амьдралд том өөрчлөлт орно. Амьдрах орчин чинь тохилог болно. Бага сургуулиуд хүүхдүүдийн гэртэй ойрхон болно. Дээр нь цэцэрлэгийн асуудлыг бүрэн шийдэж өгнө. Шинэ хуулийн төсөл боловсруулаад явж байгаа. Гэр цэцэрлэг, албан байгууллагын бичил цэцэрлэгийг дэмжинэ, стандарт тогтоож өгнө. Төрөх эмнэлэг, хүүхдийн эмнэлэг, хүүхдийн эмчийн тоог нэмэгдүүлэхийн төлөө ажиллана. Танай дүүрэгт 9000 хүүхэд цэцэрлэггүй гэртээ байна. Ээж аав нь ажил хийх боломжгүй байна гэсэн үг. Сургуулиуд гурван ээлжээр хичээллэж байна. Үүнийг ядахдаа хоёр ээлж болгоё. Үүний төлөө УИХ, Засгийн газрыг би шахаж ажиллах болно" гэсэн юм.

Харин чингэлтэйчүүд амьдралд ойрхон шийдвэр гаргаж, авлигачидтай тэмцэж ард түмний нурууг тэнийлгэж буй Ерөнхийлөгчөө дэмжинэ гэдгээ илэрхийллээ.

Н.Мөнх-Ялалт