Туркын Ерөнхий сайд Ресеп Тайип Эрдагон 10 дахь өдрөө босч буй жагсагчдад хандан тэвчээрт хязгаар бий гэдгийг анхааруулсан талаар “CNN” мэдээллээ.

Ерөнхий сайд Ресеп Тайип Эрдагон нийслэл Анкара болон өмнөд хэсгийн Адана хотуудад дэмжигчидтэйгээ уулзаж, илтгэл тавьжээ. Тэрээр “Бид тэвчээртэй хүмүүс, тэвчээртэй ч байх болно. Гэхдээ тэвчээрт хязгаар гэж байдаг юм. Жагсагчдын ард талд нуугдаж буй хүмүүс энэхүү жагсаалыг улс төрд ашиглахыг хүсч байна. Гэвч тэд эхлээд улс төр гэж юу болохыг сурах хэрэгтэй. Бид гудамжны өдөөн хатгалгад унадаг хүмүүс биш. Харин жагсагчид тийм хүмүүс юм” хэмээн хэлжээ.

Туркын нийслэлийн сүүлчийн ногоон талбай болох Гезе цэцэрлэгт хүрээлэнд олон улсын худалдааны төв барих шийдвэрийг эрх баригчид гаргасныг олон мянган хүн эсэргүүцэж байгаа юм. Өнгөрсөн сарын 31-ний өдөр эхэлсэн энэхүү жагсаал сүүлдээ Ерөнхий сайдыг огцрохыг шаардаж байна.
Турк улсын 81 дүүргийн 67-д нь олон мянган хүнийг хамарсан жагсаал болж жагсагчид цагдаа нартай мөргөлджээ. Мөргөлдөөнөөр 4300 хүн бэртэж гэмтсэн хэмээн Туркын Эрүүл мэндийн ассоциаци мэдээлж байгаа ч албан бус эх сурвалж энэ тоог 5000 давсан хэмээн үзжээ.