АНУ-ын Оклахома мужийн Моор хотод өнгөрсөн сард аймшигт хар салхи болсон. Тэгвэл тавдугаар сарын 20-ны өдөр болсон аймшигт Торнадогоос амьд гарсан таван настай хүү хөршийнхөө нохойд бариулсан харамсалтай хэрэг гарчээ.

Нэрийг нь нууцалж буй хүү рүү өнгөрсөн ням гарагт 68 кг жинтэй буллмастиф нохой дайрчээ. Гэрт нь байсан эрэгтэйн мэдээлснээр хүүг гэртээ уйлж байхад нь нохой орж ирсэн байна. Ээж нь гэртээ орж ирээд ихэд сандарч хүүгээ нохойн амнаас салгасан ч нохой нөгөө өрөөнд орж эрэгтэйг мөн хазсан байна.

Хүүг шуудхан эмнэлэгт хүргэсэн ч амийг нь аврахаас хожимдсон байжээ. Хэрэг явдал гарсан өдөр эцэг эх нь Торнадод нурсан гэрээ засахаар явахдаа таван настай хүүгээ хоёр настай охин дүүгийнх нь хамт гэртээ үлдээсэн байна. Мужийн хуулиар хэрвээ нохой дахин өөр хүн, амьтан луу дайрвал эздэд нь 500 долларын торгууль ногдуулах гэнэ.