“Дайны эрсдлийн даатгалын төлбөр”  нэрээр  их хэмжээний мөнгийг гадаад дахь зохиомол компанийн данс руу шилжүүлж, мөнгө угаасан гэх долоон холбогдогчтой МИАТ-ын экс удирдлагуудын хэргийг Шүүх бүрэлдэхүүн хэлэлцээд тус бүрт нь ял оноосон юм. Түүнчлэн тэдний хөрөнгийг улсын орлого болгосон билээ. Тодруулбал, Ч.Хоролсүрэнгийн “Монголиан эйрлайнс” компанид  эзэмшдэг хувьцааг,  “Транс трейд” гэх банк бус санхүүгийн байгууллагыг улсын орлого болгожээ. “Транстрейд” нь 50 хувь Ч.Хоролсүрэнгийнх бөгөөд дүрмийн санд нь байсан 2.3 тэрбум төгрөг, түүний нэр дээр банкинд хадгалагдаж байсан хоёр сая ам.доллар, зургаан тэрбум 600 сая төгрөг зэргийг улсын орлого болгосон байна. Б.Бат-Эрдэнийн “Эрэл” компанийн орон сууцанд байх дөрвөн өрөө байр, “Ланд” маркийн машин, Ц.Орхоны онгоцны билет борлуулдаг компанийн 50 хувийг, Б.Эрдэнэбилэгийн “Монгол крамик” компанид эзэмшдэг хувьцааг болон үл хөдпөх хөрөнгө зэргийг улсын мэдэлд шилжүүлэх шийдвэр гаргажээ. МИАТ компанид учирсан 9.3 тэрбум төгрөгийг гэм буруутай нь тогтоогдсон шүүгдэгч нараас хувь тэнцүүлэн гаргуулж, МИАТ компанид олгохоор тогтжээ.