МАН-ын Мэдээллийн технологийн хэлтсийн дарга, Бага хурлын гишүүн Б.Цогтгэрэлийн давж заалдах гомдлын дагуу өнөөдөр Нийслэлийн шүүх хуралдах байсан ч өмгөөлөгч ирээгүй шалтгаанаар хойшилсон байна.

Түүнийг  цахим хуудаснаа 2012 оны арванхоёрдугаар сарын 3-нд “Орхон аймгийн ИТХ-ын төлөөлөгчөөр сонгогдсон, АН-ын гишүүн “Баянбулаг багийн хөгжил” ТББ-ын тэргүүн Р.Улаанхүү 2012 оны арваннэгдүгээр сарын 21-ний орой орон нутгийн сонгуулийн дүн гарах үеэр АН Орхон аймагт ялсан хэмээн хөөрцөглөж архи хэтрүүлэн хэрэглэснээс бусадтай маргалдан иргэн О-гийн амийг хохироосон онц ноцтой хэрэг үйлдэн одоогоор Орхон аймгийн Цагдаагийн газарт саатуулагдан шалгуулж байна” гэсэн мэдээлэл цацсан хэргээр шалгасан юм. Б.Цогтгэрэлийг энэ оны нэгдүгээр сарын 8-нд баривчлан урьдчилан хорих 461 дүгээр ангид саатуулж, биеийн байдлын улмаас хоёрдугаар сарын 1-нд батлан даалтад гаргасан юм.

Улмаар өнгөрсөн дөрөвдүгээр сарын 15-нд Чингэлтэй дүүргийн шүүх түүнд хөдөлмөрийн хөлсний доод хэмжээг 150 дахин нэмэгдүүлсэнтэй тэнцэх хэмжээний буюу 21 сая төгрөгөөр торгох ял оноосон. Б.Цогтгэрэл энэ ялыг эсэргүүцэж давж заалдсан юм. Ямартаа түүний давж заалдах дараагийн хурал энэ сарын 27-нд болохоор боллоо.