МАН-ын сонгуулийн төв комиссын хууль зүйн ажлын хэсгээс Ерөнхийлөгчийн сонгуулийн хуулийн биелэлттэй холбоотой асуудлаар мэдээлэл хийлээ. Тэд ярихдаа “Монгол улсын Ерөнхийлөгчийн сонгууль  удахгүй болох гэж буй энэ цаг мөчид СЕХ шударга үнэний дуу хоолой болж, мэдээллийг тэнцвэртэй үнэн бодитоор хүргэх ёстой. Гэтэл зарим хэвлэл мэдээллийн байгууллагууд Ерөнхийлөгчийн сонгуулийн тухай хууль зөрчиж байхад  холбогдох байгууллагууд нь ямар ч арга хэмжээ авахгүй байгаа нь сонгууль шударга явагдах, хууль хэрэгжих нөхцөл бололцоо харагдахгүй байна” гэлээ.

Мөн сонгуулийн хууль зөрчсөн 10 гаруй үйлдэл гарсан талаар дурдсан юм. 

Тухайлбал:

1.    СЕХ-оос аймаг нийслэлийн сонгуулийн хороодыг хууль бусаар байгуулсан. Баянзүрх дүүрэгт гэхэд хэсгийн хороодод 29 хүнийг хууль зөрчиж томилсон. Мөн Орхон, Дорнод зэрэг зургаан аймагт нийт 33 хэсгийн хороог сонгогчийн тоогүй, дугааргүй байгуулж, байршлыг тогтоогоогүй гэв.

2.  АН-ын нэр дэвшигч “Төрийн эрх мэдэл, эд хөрөнгийг ашиглаж, төрийн албан хаагчийг сонгуулийн сурталчилгаанд олноор татан оролцуулсан. Тодруулбал, УДЭТ-ын ерөнхий найруулагч Н.Наранбаатарын яриаг АН-ын захиалгат нэвтрүүлгээр цацаж, төрийн тусгай албан хаагч Монгол Банкны Ерөнхийлөгч н.Золжаргал, Монгол Улсаас БНХАУ-д суугаа элчин сайд Ц.Сүхбаатар нарыг сонгуулийн сурталчилгаанд оролцуулсан нь хууль зөрчсөн ноцтой үйлдэл хэмээн ажлын хэсгийн ахлагч Ж.Сүхбаатар ярьсан юм.

3.    Сонгогчдын саналыг хууль бусаар татах чиглэлээр сонгуулийн сурталчилгаа явуулсан. Мөн АН-ын Ерөнхий нарийн бичгийн дарга Ц.Оюундарь Баянхонгор аймагт ажиллахдаа “Ц.Элбэгдоржид хамгийн өндөр хувиар санал өгсөн сумыг “Шинэ сум” төсөлд хамруулна” гэж ярьсан гэлээ.

4.  Цаашлаад “Дорнодод энэ жил 40 тэрбум төгрөгийн хөрөнгө оруулалт хийнэ. МСҮТ-ийн суралцагчдын тэтгэлгийг оюутны тэтгэлгийн хэмжээнд хүргэнэ, оюутны тэтгэлгийг хөдөлмөрийн хөлсний доод хэмжээнд хүргэнэ, таваас дээш хүүхэд асарсан эхэд жил бүр 7 сая төгрөг олгоно” гэж мөнгө амлаж байгааг хууль зөрчсөн үйлдэл гэж үзэж байгаагаа МАН-ын зүгээс хэллээ.

5. Сонгуулийн үеэр сөрөг хүчний зүгээс мөнгө тараах хандлага байгаа. Энэ талаар бид баримт нотолгоо цуглуулж байна гэсэн юм.

Энэ талаар МАН тухай бүрт нь СЕХ, Цагдаагийн газар, ШӨХТГ гэх байгууллагуудад гомдол, шаардлага хүргүүлсэн боловч өнөөг хүртэл арга хэмжээ аваагүй байгаа ба ихэнхэд нь хариу ирүүлээгүй гэнэ. Баримт, нотолгоотой нь цагдаагийн газарт гомдол гаргахад хуулийн дагуу арга хэмжээ авахгүй байгаа нь манай хууль ёсны байгууллагууд хэрхэн ажиллаж байгааг харуулж байна гэлээ.