Хятадын технологийн “Huawei” компани iPhone-той өрсөлдөхүйц утас бүтээлээ хэмээн мэдээлж байна. Тус компанийн “Ascend P6” нэрт шинэ бүтээлийг мэдэрдэг дэлгэцтэй дэлхийн хамгийн нимгэн утас хэмээн зарлалаа.

Гар утасны зузаан нь ердөө зургаан мм аж. Хар, цагаан, ягаан өнгөөр худалдаанд гарах утасны бас нэгэн давуу талыг камерын хүчин чадал хэмээн тайлбарлаж байна. Тус гар утасны “нүүрний гоо зүйг дэмжих” программ нь зураг дээрх арьсны үрчлээг багасгах, засах боломж олгох аж. Мөн алдартнуудтай гэр бүл, найз нөхөдтэйгээ хамт авахуулсан юм шиг дотны зураг бүтээх боломжтой гэлээ.

Утасны арын камерын нягтаршил нь “Apple”-ийн iPhone-ийн адил 8 мегапиксел бол нүүрний камер нь таван мегапиксел аж. iPhone-ийн нүүрний камер 1.2 мегапиксел хүчин чадалтай билээ.

Ирэх сард худалдаан гарах утас 385 фунт стерлинг буюу iPhone-оос хямд үнэтэй байх юм.