Ц.Ганзоригийн охин гурван жилийн өмнө ор сураггүй алга болж, 12 хоног дараа олдож нэг хэсэгтээ шуугиан тарьж байсныг та бүхэн санаж байгаа биз ээ.  Түүнийг Н.Алтанзул гэгч эмэгтэй нөхөр, хүүгийнхээ хамт гэртээ хорьж, биеийг нь үнэлүүлж мөнгө олдог байсан гэдэг. Энэ бүхний дараа Ц.Ганзориг  “Хүний наймааг зогсооё” хэмээн өлсгөлөн зарлаж байсан юм. Гэвч Ц.Ганзориг өнгөрсөн аравдугаар сард нас барсан.

Энэ тухай талийгаач Ц.Ганзориг “Охиноо амьд олсондоо л баярлаж байна. Хоёр жилийн өмнө охиноо алга болсны дараа нэлээн юм болж байж, 12 хоногийн дараа олсон. Гэтэл охиныг минь бие, гарыг тамхины цогоор түлж, бүр пийшингийн халуун ширмээр хүртэл түлж тарчлаасан байсан. Гарынх нь шууг шил, хутгаар зүсчихсэн гэх мэт бие нь маш их шарх сорвитой байсан. Тэр хүмүүс үгэнд нь орохгүй болохоор ингэж тарчлаадаг байсан юм билээ. Гэртээ хорьж, хүчээр биеийг нь үнэлүүлж мөнгө олдог. Монгол Улс чинь хуультай биз дээ. Гэтэл өнөөдрийг хүртэл хүний наймааны хэргийг зохион байгуулсан хүмүүст хариуцлага тооцохгүй байгаад гомдолтой байна” хэмээн ярьж байсан билээ.

Ямартаа ч өдгөө түүний эхнэр, хүү, найман сартай жирэмсэн охиныг цагдан хориод байгаа юм. Энэ тухай "Лантуун дохио" ТББ-аас олон нийтэд дэлгээд байна.

 Ямар учраас цагдан хорисныг Улсын Ерөнхий прокурорын газрын албаны хүнээс тодруулахад “Хүний наймааны хэрэгт нь холбогдуулан цагдан хориогүй. Эдгээр гурван хүн хамтдаа залилангийн хэрэг үйлдсэн. Бусдыг гадаадад сургана хэмээн залилан мэхэлсэн учир цагдан хорьсон” гэв.

Энэ талаар эргэн мэдээлэх болно.