Португалийн Сангийн сайд Витор Гаспар огцорсон тухай тус улсын Ерөнхийлөгчийн хэвлэлийн алба мэдээлжээ. Витор Гаспарыг 2011 онд санхүүгийн хүнд байдлаас гарахад олон улсын зээлдүүлэгчидтэй сайтар хамтран ажиллаж, зөв удирдаж байсан хэмээн сайшааж байсан удаатай. Гэсэн хэдий ч Португалийн ажилгүйдэл нэмэгдэж, төсвийн алдагдал энэ оны эхний улиралд ихээр нэмэгдсэн тул албан үүргээ муу биелүүлсэн хэмээн үзжээ.

Ерөнхийлөгчийн албаны мэдээлснээр Витор Гаспарын оронд Мария Луиш Альбукеркег томилно гэлээ.

Өнгөрсөн гуравдугаар сард Португалийн олон мянган иргэд эдийн засгийн бүс чангалах бодлогыг эсэргүүцэн жагссан юм. Португал улс 2011 оны тавдугаар сард 102 тэрбум ам.долларын санхүүгийн тусламжийг зээлдүүлэгчдээс авснаас хойш эдийн засгийн бүсээ чангалах бодлого баримталж иржээ.